Таямнічая і ўплывовая Меланія. Новы падыход жонкі прэзідэнта Трампа да ролі першай лэдзі
Робаты ўжо трывала занялі месца ў жыцці чалавека, і абавязак амерыканцаў — рыхтаваць сваіх дзяцей да суіснавання са штучным інтэлектам. З такой думкай звярнулася ў чацвер да ўдзельнікаў працоўнай групы па ШІ і адукацыі першая лэдзі Амерыкі, Меланія Трамп, паведамляе Бі-бі-сі.
«Наша будучыня — гэта ўжо больш не навуковая фантастыка, — працягнула Меланія Трамп. — На гэтай, прымітыўнай стадыі, наш абавязак — ставіцца да ШІ як да нашых дзяцей: падтрымліваць, але пры гэтым уважліва сачыць і накіроўваць».
Гэтае пасяджэнне працоўнай групы ў Белым доме стала адным з усяго некалькіх публічных мерапрыемстваў, у якіх удзельнічала першая лэдзі. З моманту вяртання мужа ў Белы дом Меланія Трамп дэманструе, што яна адначасова і таямнічая, і ўплывовая.
Былая мадэль Меланія Кнаус, цяпер жонка прэзідэнта ЗША Меланія Трамп, нарадзілася ў Славеніі 55 гадоў таму. Раней яе часта называлі загадкавай. Яна радзей за сваіх папярэдніц — жонак прэзідэнтаў — з’яўлялася на публіцы, выступала з прамовамі і ўдзельнічала ў розных мерапрыемствах.
Падчас перадвыбарчай кампаніі мужа ў 2024 годзе яна не раз надоўга знікала з поля зроку, і газеты выдавалі адзін артыкул за другім ад загалоўкамі накшталт «Дзе Меланія?».
Яе і цяпер не часта бачаць у Белым доме: яна, кажуць, большую частку часу праводзіць у Нью-Ёрку і Фларыдзе.
У той жа час з моманту вяртання Дональда Трампа на пасаду прэзідэнта ў гэтым студзені місіс Трамп, на думку некаторых каментатараў, стала па-іншаму — больш актыўна і адказна — падыходзіць да абавязкаў першай лэдзі. Гэтыя абавязкі ўвогуле размытыя і змяняюцца з кожным новым прэзідэнтам і яго жонкай.
Дзеці, ШІ і «порнапомста»
Цяпер Меланія шмат увагі надае тэме дзяцей, працягваючы працу, якую яна вяла ў рамках ініцыятывы «Будзь лепшым» часоў першага тэрміну Дональда Трампа. Гэта была праграма барацьбы з булінгам у інтэрнэце і наркаманіяй.
Акрамя гэтага, яна займаецца тэмай штучнага інтэлекту, а таксама адыграла важную ролю ў прыняцці закона пад назвай Take It Down Act, згодна з якім уведзена крымінальная адказнасць за публікацыю ў інтэрнэце рэальных або згенераваных ШІ інтымных выяў без згоды адлюстраванай асобы.
Гэты закон падтрымалі кангрэсмены ад абедзвюх партый, а гэта — рэдкасць у сённяшняй сітуацыі падзелу ў амерыканскай палітыцы.
Гэты закон Меланія Трамп упершыню ў гісторыі сярод першых лэдзі ЗША публічна падпісала разам з мужам. Прафесарка Эйнау Рабіновіч-Фокс, спецыялістка па гісторыі першых лэдзі ЗША, адзначае, што жонкі прэзідэнтаў нярэдка займаліся тэмай дзяцей і моладзі, але місіс Трамп выбрала некалькі іншы падыход.
«Першыя лэдзі часта засяроджваліся на тэмах, якія лічацца больш жаночымі — напрыклад, на дзіцячай адукацыі», — сказала прафесарка Рабіновіч-Фокс Бі-бі-сі.
«У выпадку з Меланіяй, напэўна, незвычайны яе падыход. Яна падыходзіць не з мацярынскага, жаночага боку — хутчэй, з дзелавога боку», — працягнула прафесарка.
У законе Take It Down Act, напрыклад, як адзначае яна, акцэнт зроблены на санкцыях у дачыненні да платформаў, дзе размяшчаюць «порна ў помсту»: цяпер яны абавязаны цягам 48 гадзін выдаляць такі кантэнт, інакш будуць пакараныя.
Мерапрыемства ў гэты чацвер у Белым доме было прысвечана адукацыі — але пры гэтым Меланію акружалі не дзеці, а члены ўрада, чыноўнікі адміністрацыі і прадстаўнікі вялікага бізнэсу — напрыклад, кампаній IBM і Google.
На думку дырэктаркі Праграмы першых лэдзі ў Амерыканскім універсітэце, былой кіраўніцы апарата першай лэдзі Лоры Буш Аніты Макбрайд, на падобных мерапрыемствах бачна перамена ў стаўленні да Меланіі Трамп у параўнанні з першым тэрмінам.
«Знешнія гульцы, якія, магчыма, раней не хацелі з ёй працаваць, цяпер гатовыя з ёй працаваць. На першым тэрміне з ёй сустракаліся неахвотна. Ёй было цяжка збіраць круглыя сталы. У яе не было моцнай структуры вакол яе», — лічыць Макбрайд.
На думку Аніты Макбрайд, засяроджваючыся на тэхналагічных, камерцыйных і заканадаўчых аспектах адукацыі і абароны дзяцей, Меланія Трамп «надае адчуванне тэрміновасці» праблемам новых тэхналогій.
«Цяпер яна выкарыстоўвае сваё становішча эфектыўна, з карысцю і змястоўна. Яна становіцца гульцом, які насамрэч можа дапамагчы з прыняццем законаў», — лічыць Макбрайд.
Ліст Пуціну
У ліпені Дональд Трамп між іншым сказаў журналістам, што абмяркоўвае свае размовы з Пуціным з жонкай, і яна — згодна з яго словамі — скептычна ставіцца да спроб дамаўляцца з Пуціным аб міры. У жніўні Меланія Трамп праз мужа перадала прэзідэнту Расіі Уладзіміру Пуціну ліст, у якім заклікала яго абараніць дзяцей у зоне баявых дзеянняў.
Гэта спроба першай лэдзі ўзяць удзел у знешняй палітыцы — і зрабіць пры гэтым акцэнт на лёсе дзяцей — не засталася незаўважанай. Пазней ёй напісалі жонкі прэзідэнтаў Украіны і Турцыі, Алена Зяленская і Эміне Эрдаган.
Былыя першыя лэдзі таксама ўдзельнічалі ў фарміраванні знешняй палітыкі ЗША. Нэнсі Рэйган, напрыклад, перапісвалася з Раісай Гарбачовай, а Пэт Ніксан і Разалін Картэр ездзілі па свеце з гуманітарнымі місіямі і займаліся «чаўночнай дыпламатыяй».
На думку Аніты Макбрайд, тое, што місіс Трамп напісала Пуціну, паказвае, што, хоць яна і радзей з’яўляецца на публіцы, чым яе папярэдніцы, яна ўсё ж такі хоча ўдзельнічаць у справах, якія яе цікавяць.
«Яна нарадзілася ў краіне, якая была пад савецкім уплывам, — мяркуе Аніта Макбрайд [гэта не зусім так, Югаславія пры Іосіпе Броз Ціта не была поўным сатэлітам СССР — Бі-бі-сі], — і адчувае нейкія рэчы, якіх іншыя, магчыма, не адчуваюць. Ёй не трэба ўдзельнічаць ва ўсіх пытаннях, але яна хоча ўдзельнічаць у тых, што ёй больш цікавыя і на якія яна можа паўплываць.
На думку Макбрайд, у астатнія тры гады ў Белым доме Меланія Трамп гэтак жа будзе надзвычай выбарачна падыходзіць да таго, у чым удзельнічаць у якасці першай лэдзі.
«Яна робіць гэта на сваіх умовах. Яна — за якасць, а не колькасць, — лічыць Макбрайд. — Яна не збіраецца азірацца на тое, як іншыя паводзілі сябе на яе месцы ў мінулым».
Каментары