Польшча закрывае мяжу з Беларуссю на нявызначаны тэрмін і чакае правакацый
Рашэнне аб закрыцці мяжы з Беларуссю прынята не толькі на час вучэнняў «Захад-2025», паведаміў міністр унутраных спраў і адміністрацыі Польшчы Марцін Кярвінскі ў інтэрв’ю радыёстанцыі TOK FM.
Паводле яго слоў, рашэнне аб закрыцці мяжы прынята не толькі на час вучэнняў, але ў больш шырокім кантэксце: «Мы баімся правакацый у шырокім сэнсе: узмацнення міграцыйнага націску, спроб нелегальнага пераходу на польскую тэрыторыю, праезду асоб, небяспечных для бяспекі краіны. Адсюль такое жорсткае рашэнне», — сказаў ён.
Кярвінскі падкрэсліў, што «зачыненне мяжы — не на час вучэнняў, а ў сувязі з імі». «Тэрмін закрыцця мяжы не вызначаны», — дадаў ён. Пры гэтым ён заўважыў, што «мяжа не будзе заставацца зачыненай ні на адзін лішні дзень».
Міністр лічыць, што гэтае рашэнне апраўданае з пункту гледжання бяспекі Польшчы. «З пятніцы да аўторка адбудзецца найбольш агрэсіўная частка вучэнняў — манеўры, якія фактычна імітуюць поўнамаштабны канфлікт з сіламі НАТА, уключаючы тэрыторыю Польшчы», — адзначыў ён.
Каментары