Навукоўцы ўпершыню зафіксавалі спарванне леапардавых акул. Аказалася, што ўдзельнічаюць самка і адразу два самцы ВІДЭА
Даследчык пабачыў, як два самцы трымалі самку за грудныя плаўнікі, уключыў камеру GoPro — і стаў чакаць.
Як паведамляе The Gardian, ля берагоў Новай Каледоніі вучоныя ўпершыню змаглі зафіксаваць на відэа працэс спарвання леапардавых акул у дзікай прыродзе.
Па словах аўтара відэа, доктара Гуга Ласо (Hugo Lassauce) з Універсітэта Саншайн-Коста (Аўстралія), ён назіраў за папуляцыяй леапардавых акул, калі заўважыў незвычайную сцэну.
«Падчас нырання з маскай я заўважыў на пясчаным дне самку, якую два самцы трымалі за грудныя плаўнікі, — распавядае навуковец. — Я адразу падумаў: «Нешта павінна адбыцца — я застаюся тут са сваімі камерамі GoPro». Праз гадзіну гэта нарэшце здарылася».
Увесь працэс заняў крыху менш за дзве хвіліны — дакладна 110 секунд. Першы самец справіўся за 63 секунды, а другі, які дзейнічаў адразу пасля яго, — за 47.
«Пасля гэтага самцы страцілі ўсю сваю энергію і нерухома ляглі на дно, у той час як самка актыўна паплыла прэч», — дадаў Ласо.
Гэты выпадак стаў першым зафіксаваным назіраннем за спарваннем леапардавых акул у іх натуральным асяроддзі. Спецыяліст адзначае, што рэпрадуктыўныя паводзіны дзікіх акул у цэлым застаюцца малавывучанымі.
«Паводзіны акул моцна адрозніваюцца ад паводзін дэльфінаў, — кажа Ласо. — Для дэльфінаў спарванне — гэта звычайная справа, яны робяць гэта вельмі часта».
Па словах доктаркі Крысцін Даджон (Christine Dudgeon), эксперткі ў галіне марской экалогіі і эвалюцыі, якая працавала з леапардавымі акуламі больш за два дзесяцігоддзі, відэа Ласо мае велізарнае значэнне для захавання віду. Яно сведчыць, што тэрыторыя ля Новай Каледоніі з'яўляецца важным месцам для размнажэння. Відэазапіс можа дапамагчы распрацаваць стратэгіі кіравання і аховы прыроды.
Больш за тое, рэдкія кадры могуць дапамагчы ў даследаваннях па штучным апладненні, накіраваных на аднаўленне папуляцыі віду, якія ў цяперашні час праводзяцца ў некалькіх краінах, у тым ліку ў Аўстраліі.
«Дзіўна і захапляльна, што ў гэтым выпадку паслядоўна ўдзельнічалі два самцы, — кажа Даджон. — З пункту гледжання генетычнай разнастайнасці нам важна высветліць, колькі бацькоў удзельнічае ў стварэнні партый яек, якія самкі адкладаюць кожны год».
Навуковы артыкул з падрабязным апісаннем гэтага траістага саюза апублікаваны ў часопісе Journal of Ethology.
«Сыночак, ты ў мяне адзін». Маці з Дуброўна просіць 18‑гадовага сына вярнуцца з расійскай арміі і звяртаецца да Лукашэнкі13
«Сыночак, ты ў мяне адзін». Маці з Дуброўна просіць 18‑гадовага сына вярнуцца з расійскай арміі і звяртаецца да Лукашэнкі
Адвакат Аляксандр Данілевіч: Мяне адвялі ў клетку на КПП і зачыталі ўказ для службовага карыстання пра памілаванне па просьбе Міжнароднага алімпійскага камітэта1010
Каментары