Аляксандр Лукашэнка паведаміў, што Аман выдзяляе Беларусі зямельны ўчастак для стварэння турыстычнага кластара. Пра гэта ён расказаў падчас абмеркавання кадравых прызначэнняў.
На ўзбярэжжы Амана. Фота: Wikimedia Commons
Як сцвярджае Лукашэнка, у Амане Беларусь зможа стварыць уласны буйны турыстычны цэнтр.
«Зямлю нам выдзяляюць, каб мы там стварылі свой велізарны турыстычны кластар. Каб людзі маглі лётаць не толькі ў Турцыю і Эміраты. Гэта ж літаральна гадзіну [больш, чым у ААЭ] — і ты там, у акіяне. Адкрыты акіян. Вось, калі ласка, прыходзьце, працуйце, дзверы адчыненыя. Але трэба ісці, трэба ісці!», — захапляўся палітык.
Ён падкрэсліў, што Аман гатовы да шырокага супрацоўніцтва: беларускім кампаніям прапануюць магчымасці ў партах і на заводах, у тым ліку для вытворчасці і экспарту калійных угнаенняў.
Акрамя таго, аманскі бок плануе ўдзельнічаць у буйных праектах і на тэрыторыі Беларусі. Адзін з іх — будаўніцтва цэлюлозна-кардоннага камбіната. Мемарандум аб гэтым быў падпісаны 6 кастрычніка пасля перамоў у Мінску паміж Лукашэнкам і султанам Амана.
Каментары
А што наўзамен, цэлюлозна-кардонны камбінат, слынны аб'ект забруджвання навакольля, які да таго ж патрабуе драўніну(лясы)... Рабіце высновы.