Прэзідэнт ЗША Дональд Трамп заявіў у суботу, што не плануе сустракацца з прэзідэнтам Расіі Уладзімірам Пуціным, пакуль не палічыць, што заключэнне мірнага пагаднення паміж Расіяй і Украінай сапраўды магчымае.
Прэзідэнт ЗША Дональд Трамп растлумачыў прычыны адмены запланаванай сустрэчы з Уладзімірам Пуціным у Будапешце. Паводле яго слоў, ён не жадае «марнаваць свой час» і павінен быць упэўнены, што бакі сапраўды збіраюцца заключыць пагадненне.
«У мяне заўсёды былі выдатныя адносіны з Уладзімірам Пуціным, але ўсё гэта аказалася вельмі расчаравальным», — сказаў Трамп.
Сустрэча лідараў ЗША і Расіі была прызначаная пасля тэлефоннай размовы паміж імі 16 кастрычніка. Аднак падрыхтоўка да яе была адменена пасля перамоў паміж дзяржсакратаром ЗША Марка Рубіа і кіраўніком МЗС Расіі Сяргеем Лаўровым. Паводле CNN, гэта здарылася праз розныя чаканні ад сустрэчы.
Трамп пацвердзіў, што адмяніў саміт, бо на ім «не дасягнём таго, чаго павінны былі б», але дадаў, што такая сустрэча адбудзецца ў будучыні.
Уладзімір Пуцін, у сваю чаргу, заявіў, што і сустрэча, і месца яе правядзення былі прапанаваныя амерыканскім бокам, і выказаў меркаванне, што Трамп хутчэй казаў пра перанос, а не адмену. Тым не менш, 24 кастрычніка ў ЗША прыбыў спецпрадстаўнік расійскага прэзідэнта Кірыл Дзмітрыеў для абмеркавання сітуацыі.
Каментары