Адкрыццё пераходаў Польшчы з Беларуссю адкладзена на некалькі тыдняў
Адкрыццё двух пераходаў на мяжы Польшчы і Беларусі адкладзена на некалькі тыдняў. Пра гэта заявіў у эфіры праграмы «Сігналы дня» польскага радыё міністр унутраных спраў і адміністрацыі Польшчы Марцін Кервіньскі, паведамляе Reform.news.
«За апошнія два гады ўрад Дональда Туска здолеў моцна ўмацаваць мяжу, і працэс нелегальнай міграцыі на польска-беларускай мяжы ўзяты пад кантроль. Гэта, па-першае. Па-другое, у нас адкрыты памежныя пераходы з Беларуссю, але ў Люблінскім ваяводстве. Некаторы час таму прэм’ер-міністр зноў казаў аб адкрыцці новых памежных пераходаў, на гэты раз у Падляшскім ваяводстве. І мы, верагодна, зрабілі б гэта значна раней, калі б не той факт, што Літва адначасова свае пераходы з Беларуссю закрывае. Літоўцы — гэта нашы партнёры, мы з імі ў кантакце. Я размаўляў з намеснікам міністра ўнутраных спраў, і падчас учарашняй сустрэчы ў Гданьску, і сёння я буду гаварыць па тэлефоне. Падтрымаем літоўцаў у гэтым рашэнні. Таму адкрыццё пераходаў у Падляшскім ваяводстве адкладваецца на некалькі тыдняў, але рашэнне тут было прынята», — сказаў ён.
Па яго словах, дакладнай даты адкрыцця пераходаў няма.
Нагадаем, у аўторак прэм’ер-міністр Польшчы Дональд Туск заявіў, што ў лістападзе на пробны перыяд будуць адкрыты пераходы «Кузніца» (закрыты з 2021 года) і «Баброўнікі» (закрыты з 2023 года).
Аднак у сераду ўрад Літвы прыняў рашэнне закрыць мяжу з Беларуссю да 30 лістапада, пакінуўшы магчымасць перасякаць яе ў пункце пропуску «Меднікі» толькі для некаторых катэгорый асоб. Пры гэтым члены літоўскага ўрада заяўлялі, што разлічваюць на салідарнае рашэнне польскага боку.
Каментары
Мяжа зараз - гэта цудоўная лялька, забуляцца ей будуць яшчэ доўга
Адчыніце ютуб і паглядзіце першакрыніцу - выступ пана Кервінскага.
Там ен асабліва падкрэсліў - мы адкладаем, дату адкрыцця пакуль не кажам, але рашэнне прынятые - пераходы будуць адчыняцца.
Палякі спрабуюць адначасова выратаваць небаракаў-літоўцаў, якія нарабілі глупстваў, і утрымаць дамоўленасці з рэжымам.