Колькі трэба будзе заплаціць?
Змены прадугледжвае законапраект, апублікаваны на Нацыянальным прававым партале.
Для фізічных асоб падатак на легкавыя аўто вырасце на 5‑17 рублёў у залежнасці ад агульнай дапушчальнай вагі транспартнага сродку.
За легкавы аўтамабіль, які мае дазволеную максімальную масу да 1,5 тоны (або няма інфармацыі пра гэта), падатак плануюць павысіць з 70 да 75 рублёў.
Для іншых катэгорый аўто падатак будзе такі:
- 1,5—1,75 тоны — 99 рублёў (было 92);
- 1,75—2 тоны — 124 рублі (было 116);
- 2—2,25 тоны — 148 рублёў (было 138);
- 2,25—2,5 тоны — 177 рублёў (было 161);
- 2,5—3 тоны — 196 рублёў (было 183);
- больш за 3 тоны — 270 рублёў (было 253).
Прычэпы і матацыклы
За прычэп з агульнай дапушчальнай масай да 750 кг і за прычэп-дачу падатак плануюць падняць да 49 рублёў (было 46).
За прычэп з агульнай масай больш за 750 кг (пад катэгорыю Е) — да 270 рублёў (было 253).
За матацыкл — да 49 рублёў.
Грузавы транспарт у фізічных асоб
За грузавы і грузапасажырскі транспарт агульнай масай да 2,5 тоны (катэгорыя В) падатак будзе 196 рублёў.
Калі ад 2,5 да 3,5 тон (таксама катэгорыя В) — 418 рублёў.
За грузавікі пад катэгорыю С стаўкі будуць выглядаць так:
- 3,5—12 тон — 541 рубель;
- больш за 12 тон — 614 рублёў.
Юрыдычныя асобы і ІП
Для арганізацый і індывідуальных прадпрымальнікаў стаўкі аўтамабільнага падатку традыцыйна больш высокія. Адпаведна і рост запланаваны вышэйшы — ад 13 да 25 рублёў за легкавыя аўто.
Стаўкі будуць выглядаць наступным чынам:
- да 1 тоны — 196 рублёў (было 183);
- 1—2 тоны — 253 рублі (было 196);
- 2—3 тоны — 309 рублёў (было 289);
- больш за 3 тоны — 393 рублі (было 368).
За грузавы і грузапасажырскі транспарт агульнай масай да 2,5 тоны (катэгорыя В) падатак будзе 337 рублёў.
Калі ад 2,5 да 3,5 тоны (таксама катэгорыя В) — 477 рублёў.
За грузавікі пад катэгорыю С стаўкі будуць выглядаць так:
- 3,5—12 тон — 617 рублёў;
- больш за 12 тон — 702 рублі.
За сядзельны цягач (галава фуры) — 562 рублі.
За матацыклы — 85 рублёў.
За прычэпы з вагой да 750 кг падатак падымуць да 141 рубля, за прычэп больш за 750 кг (пад катэгорыю Е) — да 337 рублёў.
Заможных аўтаўладальнікаў таксама чакаюць змены
Нагадаем, што з 2024 года для ўласнікаў люксавых аўто ўведзены дзесяцікратны падатак.
То-бок, за ўмоўны Bentley Bentayga, які мае масу больш за 3 тоны, фізічная асоба будзе плаціць падатак у 2700 рублёў.
Дарэчы, з наступнага года падатак за люксавыя аўто будуць узнімаць па іншай схеме.
Вельмі дарагія аўтамабілі люксавых марак будуць абкладацца дзесяцікратным падаткам да дасягнення імі дзесяцігадовага ўзросту, а люксавыя, але больш простыя маркі і мадэлі — толькі цягам 3—5 гадоў з моманту выпуску.
Згодна з праектам рэспубліканскага бюджэту, налета плануюць сабраць амаль 383,8 млн рублёў ад транспартнага падатку. Селета гэта было каля 350 млн.
Каментары