Віцебскі футбаліст, які абразіў падчас матча камерунца, ездзіў у Смаргонь прасіць у яго прабачэння
Форвард футбольнага клуба «Віцебск» Валерый Гарбачык расказаў выданню sports.ru пра свой канфлікт з камерунскім абаронцам «Смаргоні» Крысціянам Інтсаэнам, у выніку якога быў выдалены з поля і абвінавачаны ў расісцкіх выказваннях.
— Валерый, што адбылося ў Смаргоні?
— Была сутычка ў штрафной, пасля якой я не стрымаў эмоцый. Шчыра, нават не памятаю, што гаварыў. Эмоцыі захліснулі, пасля гэтага ўбачыў перад сабой «чырвонае святло».
— Словы «чорнае шымпанзэ» сапраўды прагучалі?
— Менавіта такіх слоў я не ўжываў — гэта дакладна. Былі словы, але іншыя, наколькі памятаю. Цяпер у Смаргоні, мы толькі што сустрэліся з Інтсоенам, пагаварылі, усё ўладзілі. Я перад ім папрасіў прабачэння за свае паводзіны, за сваю эмацыйнасць, за тое, што нагаварыў некультурных слоў.
Прабачэнні былі ўзаемнымі. Ён сказаў, што ніякіх пытанняў да мяне не мае — мы паціснулі рукі.
— Гэта ваша асабістая ініцыятыва ці так падказалі ў клубе?
— У першую чаргу мая, але і ў клубе сказалі, што магу гэта зрабіць. Інтсоен адразу пагадзіўся на сустрэчу, ніякіх пытанняў не было.
— Вы ж раней гулялі з чарнаскурымі футбалістамі ў адной камандзе?
— Вядома, гуляў. У «Тарпеда-БелАЗ» з Эвансам Менса. У нас з ім было нават асобнае святкаванне гола, сваё індывідуальнае прывітанне. Усе скажуць, што нічога дрэннага я не рабіў. І [івуарыец] Ян Афі так скажа, і [івуарыец] Жан По. З усімі добра камунікаваў.
Занадта шмат чаго хочуць з гэтай сітуацыі. Так, непрыемны інцыдэнт, але… Не маю ніякіх прэтэнзій да колеру скуры, я не расіст. Шмат з кім гуляў, набярыце любому, яны скажуць пра мяне толькі добрае.
— Вы спакойны чалавек?
— Так, але ў кожнага бывае такая эмацыйная выхалашчанасць, што цяжка сябе кантраляваць. Так атрымалася, віны з сябе не здымаю.
— Моцна перажываеце?
— Вельмі моцна. Я падвёў каманду, а калі б прапусцілі ў матчы гол… Тут яшчэ дыскваліфікацыю магу атрымаць. Я ўсё вельмі блізка ўспрымаю да сэрца, цяжкі перыяд.
— Спалі ноччу?
— Можна сказаць, не спаў наогул. Спадзяюся пазбегнуць вялікай дыскваліфікацыі. Паглядзім, што суддзя скажа на пасяджэнні.
Беларускі футбаліст назваў суперніка «чорным шымпанзэ». Яму пагражае дыскваліфікацыя і штраф
Футбольныя легіянеры з Афрыкі расказалі, як ім заходзяць стравы беларускай кухні
Любіць дранікі з мясам, ужо прывык да беларускай бульбы і ведае некалькі беларускіх слоў. Камерунскі футбаліст расказаў, як яму жывецца ў Смаргоні
Пра што маўчыць Аляксей Францкевіч, якому Польшча закрыла ўезд на 10 гадоў67
Каментары