«Засталося толькі некалькі пунктаў». У Белым доме сказалі, што большасць пунктаў мірнага плана па Украіне ўзгодненыя
Сустрэча паміж Трампам і прэзідэнтам Украіны Уладзімірам Зяленскім не запланавана.
Прэс-сакратар Белага дома Каралін Левіт сказала ў панядзелак, што прэзідэнт Дональд Трамп «застаецца аптымістычным, што ўдасца дасягнуць пагаднення», каб спыніць вайну Расіі з Украінай пасля перамоў у Жэневе, якія прайшлі ў выходныя, піша CNN.
Трамп выказаў незадаволенасць з-за зацягнутай вайны ў паведамленні ў сацыяльных сетках у нядзелю раніцай, заяўляючы, што Украіна «выказала нулявую ўдзячнасць» за яго намаганні спыніць вайну.
«Прэзідэнт апублікаваў гэтае паведамленне на выходных, — сказала Левіт Fox News у панядзелак, — і з таго часу адбыліся вельмі прадуктыўныя размовы паміж камандай прэзідэнта па нацыянальнай бяспецы і ўкраінскай дэлегацыяй».
Яна дадала, што дзяржаўны сакратар Марка Рубіа і спецыяльны пасланнік Стыў Уіткаф правялі нядзелю ў Жэневе, дзе яны прайшліся па плане міру, які падтрымліваюць ЗША, «з улікам дадзеных як з расійскага боку, так і з украінскага боку». Яна сказала, што ім удалося «адшліфаваць пункты, і цяпер застаецца толькі некалькі пунктаў нязгоды, над якімі нашы каманды працягваюць працаваць».
Левіт сказала, што Трамп «з’яўляецца прэзідэнтам мірнага часу», дадаўшы: «ён застаецца аптымістычным, і я ведаю, што нашы каманды працуюць кругласутачна, каб паспрабаваць давесці гэтае пагадненне да завяршэння».
Размаўляючы з журналістамі каля Белага дома пасля інтэрв’ю, Левіт сказала, што сустрэча паміж Трампам і прэзідэнтам Украіны Уладзімірам Зяленскім не запланавана.
Цяпер чытаюць
Былы беларускі міліцыянер шукае «пародзістую прыгажуню». Называе сябе мільянерам, а сам судзіцца з былой жонкай за аліменты24
Каментары