Пасля прызнання брэнда Belaruskicry экстрэмісцкім яго вырабы плагіяцяць іншыя ювеліры з Мінска ФОТЫ
Раней мінскі брэнд All bling выпускаў падвескі «по*уй» і «скуф», а цяпер спрабуе зрабіць касу на пазнавальным чужым дызайне з беларускімі словамі.
У ліпені праект з ювелірнымі ўпрыгожаннямі Belaruskicry быў прызнаны экстрэмісцкім фармаваннем і сышоў з беларускага рынку. Да таго ж быў затрыманы дырэктар па вытворчасці Ягор Бужылаў. Пакуль у адных бізнэс быў разбураны, іншыя вырашылі нажыцца на ўжо папулярным дызайне — так, пад брэндам All bling сталі прадавацца амаль ідэнтычныя падвескі.
All bling маюць ювелірную майстэрню ў Мінску і працуюць на рынак Расіі і Беларусі, адразу падаюць цэны ў дзвюх валютах.
Стартавалі яны ў 2021 годзе, ствараючы пераважна дызайны з рускамоўнымі і англамоўнымі словамі, часта — з мацюкамі: напрыклад, падвескі «б*я», «пошёл на*уй», «по*уй», «по*уистка», «е*ашь». Таксама брэнд спрабуе гумарыць, прапаноўваючы насіць на сабе словы «скуф», «kuniman», «писька». Ці гуляецца з імёнамі: «Катястрофа», «АлкогОля», «ПьЮлия».
А вось беларускамоўны дызайн стаў актыўна прадавацца тут акурат пасля таго, як з рынку прыбралі канкурэнтаў.
Можаце параўнаць упрыгожанні на скрыншотах ніжэй (розніца будзе выключна ў цане — падвеска All bling каштуе 59 рублёў, бо зробленая са сталі, а ў Belaruskicry гэта было срэбра і прадавалася амаль за сто даляраў).
Таксама на днях у інстаграме All bling з’явіўся дызайн «Каханне» і падвеска ў выглядзе літары «Ў» — тое, што ў свой час актыўна прадавалі стваральнікі Belaruskicry па ўсім свеце.
Пытанне журналіста «Нашай Нівы» пра тое, ці ўзгаднялі ўладальнікі All bling моманты з аўтарскім правам, было праігнараванае. У той жа час прадстаўнік каманды Belaruskicry пацвердзіў, што гэта — прамы плагіят: «У нас усё скралі».
Раней у Беларусі (і за мяжой) ужо былі спробы паўтараць поспех Belaruskicry — тыя ж упрыгожванні з контурамі карты Беларусі рабілі і іншыя ювеліры. Тады стваральніца брэнда Аляксандра Куркова каментавала СМІ, што выступае супраць наўпроставага капіявання, але прызнавала, што карта Беларусі належыць усім:
«Проста ў кожнага павінна быць аўтарская інтэрпрэтацыя, не плагіят».
Пры спробе замовіць падвеску «Каханне» ў тэлеграме All bling журналісту «Нашай Нівы» паведамілі, што «зараз гэта адзін з самых папулярных дызайнаў».
Цяпер чытаюць
«Пасля першага забойства з ім развялася жонка». Што вядома пра шматдзетнага Сяргея са Столінскага раёна, які пасля вызвалення з калоніі забіў трох чалавек3
«Пасля першага забойства з ім развялася жонка». Што вядома пра шматдзетнага Сяргея са Столінскага раёна, які пасля вызвалення з калоніі забіў трох чалавек
Дарадца прэзідэнта Польшчы пракаментаваў зварот Калеснікавай і Золатавай: Лукашэнка выпускае некалькі дзясяткаў вязняў, а на наступны дзень затрымлівае новых2323
Каментары