«Не хачу чуць «спердаляй да Украіны» толькі таму, што размаўляю з бацькамі па тэлефоне на рускай». Беларусы дзеляцца, чаму вяртаюцца з Польшчы
У сацсетках разгарэлася гарачая дыскусія.
Арэнда кватэры — вырашальнае пытанне?
«Ёсць тут такія, хто жыў у Польшчы і вярнуўся назад у Беларусь?» — спытала беларуска ў Threads.
Дзяўчына адзначыла ў сваім допісе, што пасля амаль 4 гадоў у Польшчы вярнулася перш за ўсё праз жытло, бо кожны месяц у Варшаве яна плаціла за кватэру па 1000 даляраў, а ў Мінску ў яе ёсць свая кватэра.
«Але я ўсё гэтак жа сумую па дасяжнасці ўсяго і рытму жыцця. Дзяліцеся, а чаму вы вярнуліся і як вам тут», — пытаецца аўтарка допісу.
«Ключавы момант — свая кватэра ў Мінску. На цяперашні момант і тут можна ашалець ад арэнды і куплі жылля», — заўважаюць каментатары. Многія дадаюць, што цяпер годная кватэра ў Мінску здаецца за 600—700 даляраў на месяц.
«Мець магчымасць вяртацца ў Беларусь — прывілей (і я шчыра радая за тых, хто рэальна можа вяртацца). Значыць, дома нічога не пагражала, і прычыны пераезду былі эканамічныя, а не палітычныя», — гучыць каментар, напісаны па-беларуску.
«Як можна добраахвотна вярнуцца ў балота?» — задаецца пытаннем іншая жанчына.
«Жыву ў Кракаве, сваё жыллё, не ўяўляю ўжо жыццё ў РБ, мне там няма чаго рабіць. Тут праца, хобі, сябры, падарожжы. А калісьці было вельмі складана пераязджаць», — дзеліцца досведам іншая.
Але сярод каментатараў хапае тых, хто, як і аўтарка допісу, пасля жыцця ў Польшчы вярнуўся ў Беларусь і не шкадуе.
Пражылі каля 10 гадоў у Польшчы і вярнуліся ў Беларусь
Адна жанчына напісала, што вярнулася ў Беларусь дзеля лепшай будучыні для дзіцяці.
«Вярнулася ў Беларусь з дзіцём. Польшча стала не тая, як раней, ды і свая кватэра ў РБ ёсць. Перыядычна накатвае, і вельмі сумую і хачу вярнуцца. Але вучуся адаптавацца да жыцця ў Беларусі», — піша яна.
«Не вярнуся туды (у Польшчу. — НН) дзеля дзіцяці. Не хачу чуць хейт апошнія два гады «спердаляй да Украіны» толькі таму, што ў мяне зазваніў тэлефон і я размаўляю з бацькамі на рускай», — дадае яна.
«Вярнулася пасля 11 гадоў жыцця ў Варшаве, ні пра што не шкадую», — піша дзяўчына, якая пераехала назад у Мінск.
«Вярнуліся з мужам з Польшчы ў Беларусь. Нарадзілі дзіця, будуем дом, муж працуе, я ў дэкрэце. Родныя і сябры побач. Не шкадуем аб рашэнні. Дом у Польшчы мы б не пацягнулі, ды і пра сям’ю там зусім думак не было — адна праца», — піша іншая каментатарка.
«У Мінску ў мяне кватэра, сям'я, сябры. Цэны разы ў два ніжэйшыя. Бясплатная медыцына ці недарагая платная. Куча кругласутачных установаў і гіпераў. Сэрвіс, дзе не трэба стаяць у чарзе на вуліцы ў с*аную кавярню 20 хвілін», — дзеліцца яшчэ адзін мужчына.
Прадукты таннейшыя ў Беларусі?
Тыя, хто вырашыў вярнуцца, апроч аргументаў пра дарагую нерухомасць і высокія арэндныя стаўкі, нярэдка згадваюць праблемы з дакументамі. Іншыя заўважаюць, што без карты паляка ў Польшчы няма чаго рабіць, бо, маўляў, жыццё ператвараецца ў пастаянную пагоню за працай і дакументамі.
Адметна, што сярод тых, хто вярнуўся з Польшчы, хапае не толькі мінчан.
«Такaя ж гісторыя, як у вас, толькі вярнуліся ў Гродна», «Працаваць у Польшчы нармальна, але вярнулася ў сваю кватэру ў Брэсце», — пішуць людзі з іншых гарадоў.
Ёсць і тыя, хто толькі задумваецца пра вяртанне.
«Я з тых, хто пакуль не вярнуўся, але часта задумваецца», — піша шматдзетная маці з Беларусі і пералічвае плюсы і мінусы.
«Цэны ў РБ далёка не ніжэйшыя. Так, на малочку моцна ніжэйшыя. На ўсё астатняе плюс-мінус тое самае, а нешта ў Польшчы моцна танней. Ключавое — ёсць свая кватэра ў Беларусі, а тут здымаць трэба. Пакуль усё перакрывае магчымасць ездзіць па ЕС».
Яшчэ беларусцы падабаецца польская школа, бо там не прымушаюць наведваць розныя гурткі.
Знаходзяцца і тыя, хто вярнуўся ў Беларусь, але пры гэтым кожны дзень сумуе па Варшаве.
«Я пражыла ў Варшаве 9 гадоў. За жытло ў месяц было $1200, а ў Новай Баравой свая кватэра. Вярнуліся сям’ёй у пачатку 2024 года праз шмат розных фактараў. Сумую па Ваве кожны дзень».
Тым не менш многія сыходзяцца ў меркаванні, што ўсё ж наяўнасць жытла ў Мінску — адзін з важных фактараў, які можа ўплываць на жаданне вярнуцца.
Аўтарцы допісу таксама раілі, што пры жаданні яна магла б прадаць кватэру ў Новай Баравой і набыць у Варшаве, на што тая адказала, што для гэтага не хапае яшчэ мінімум 100 тысяч даляраў.
Іншыя наогул адзначаюць, што пры пераездзе ў Польшчу не абавязкова ехаць у Варшаву з яе высокімі цэнамі на нерухомасць. Маўляў, у малых польскіх гарадах ёсць усё, што трэба для камфортнага жыцця.
«Наша Нiва» — бастыён беларушчыны
ПАДТРЫМАЦЬ
Азараў моцна пакрыўдзіўся на словы «псеўдалідаркі Ціханоўскай», што яго План Перамога быў памылкай32
Каментары