Дарадчыца Трампа ахарактарызавала яго як помслівую асобу з характарам алкаголіка, а Маска — як кетаміншчыка
Кіраўніца апарату Белага дома С'юзан Уайлс нечакана адкрыта выказалася ў інтэрв'ю амерыканскаму часопісу Vanity Fair. Сярод іншага яна заявіла, што прэзідэнт ЗША Дональд Трамп мае «характар алкаголіка», рысы якога ўзмацняюцца пры ўжыванні спіртнога.
Уайлс распавяла, што вырасла з бацькам-алкаголікам і добра разбіраецца ў падобных «яскрава выяўленых асобах». Яна падзялілася ацэнкамі Трампа і яго атачэння так, нібыта ёй не даводзіцца баяцца за сваё працоўнае месца, піша BILD.
Вось самыя прыкметныя выказванні:
Трампам рухае прага помсты. Многія дзеянні падчас яго другога тэрміну прадыктаваны імкненнем да адплаты. «Я не думаю, што ён прачынаецца раніцай і думае пра помсту. Але калі з'яўляецца магчымасць, ён ёю скарыстаецца», — кажа Уайлс.
Трамп ігнаруе парады, у тым ліку па пытаннях дэпартацый, мытных пошлін і памілаванняў. Напрыклад, Уайлс распавядае, што беспаспяхова спрабавала пераканаць яго адкласці абвяшчэнне буйных мытных тарыфаў, паколькі сярод яго дарадцаў існавалі «сур'ёзныя рознагалоссі» наконт гэтага.
«Ён дзейнічае ў перакананасці, што няма нічога, чаго ён не змог бы дамагчыся. Нічога, абсалютна нічога», — кажа пра яго характар дарадца.
Уайлс таксама непахвальна выказваецца пра віцэ-прэзідэнта Джэй Дзі Вэнса. Паводле яе слоў, ён «ужо дзесяцігоддзе з'яўляецца канспіролагам», а яго ператварэнне з крытыка Трампа ў лаяльнага саюзніка было «цалкам палітычна матываваным».
Пра тэхналагічнага мільярдэра і былога саюзніка Трампа Ілана Маска Уайлс кажа, што ён — прызнаны спажывец кетаміну і «дзівак, як гэта часта бывае з геніямі».
Пасля публікацыі інтэрв'ю Уайлс абрынулася з крытыкай на Vanity Fair у X і заявіла, што яе словы вырваны з кантэксту.
«Апублікаваны сёння раніцай артыкул — гэта ілжывы заказны матэрыял супраць мяне і найлепшага прэзідэнта, найлепшых супрацоўнікаў Белага дома і найлепшага кабінета ўсіх часоў.
Былі праігнараваны важныя кантэксты, і многае з таго, што я і іншыя казалі пра каманду і прэзідэнта, было апушчана. Пасля прачытання я зыходжу з таго, што гэта зроблена для таго, каб намаляваць паслядоўна хаатычны і негатыўны вобраз прэзідэнта і нашай каманды», — напісала яна.
На артыкул таксама адрэагавала прэс-сакратар Белага дома Кэралайн Левіт: у Трампа «няма больш важнай ці больш лаяльнай дарадцы, чым С'юзі», і ўвесь урад, «удзячны ёй за яе разважлівае кіраўніцтва», згуртавана стаіць за Уайлс.
Цяпер чытаюць
Шалёна папулярная мінская блогерка патраціла на святкаванне дня нараджэння амаль $16 тысяч34
Каментары