Гайд па месцах, дзе можна традыцыйна адсвяткаваць Каляды

Каляды ў традыцыйнай беларускай культуры былі часам, калі ў адной хаце суіснавалі розныя сусветы. Хрысціянскія малітвы і народныя ўяўленні, побыт і чараўніцтва не супярэчылі адно аднаму. Да свята хаты ўпрыгожвалі саламянымі «павукамі», якія мусілі бараніць дом, спявалі калядкі.

Павялічыць

Калядны час адкрываў перыяд забаў і гасцяванняў: людзі хадзілі ў госці адзін да аднога, спявалі, танчылі і гулялі. Асобнае месца займала варажба — асабліва сярод дзяўчат, якія спрабавалі даведацца пра будучае замужжа, сям’ю і дзяцей. На Гомельшчыне, напрыклад, такой варажбы зафіксавана асабліва шмат.

Павялічыць

Ніжэй — некалькі месцаў у Беларусі, дзе традыцыйныя калядныя абрады спрабуюць захаваць жыўцом.

Музей народнай архітэктуры і побыту пад Мінскам

27 снежня, 13:00—14:30

Каляды ў Музеі народнай архітэктуры і побыту аднаўляюць не як шоу, а як абрад.

Аснова праграмы — калядны абыход, у якім могуць паўдзельнічаць і госці музея: калядоўнікі віншуюць гаспадароў, гучаць абрадавыя песні, у тым ліку «Дзе каза ходзіць, там жыта родзіць», з’яўляюцца калядныя персанажы і бэтлеемская зорка. Асобнае месца займае батлейка — традыцыйны лялечны тэатр.

Акрамя абыходу, наведвальнікі змогуць далучыцца да калядных заняткаў — гульняў, танцаў, вырабу ўпрыгажэнняў, а таксама да варажбы.

Вялікае княства Сула

24 снежня і 6 студзеня, 19:00

У комплексе «Вялікае княства Сула» Каляды прапануюць перажыць у фармаце тэматычнай вячэры «Калядная спадчына Беларусі». Падчас свята госці не проста назіраюць, а становяцца часткай абрадаў — у тым ліку «Калядных цароў» і «Пячы ката».

Для гасцей рыхтуюць святочную вячэру з традыцыйных страў, якія ў беларускай культуры звычайна гатавалі толькі раз на год — падчас калядных тыдняў.

У Суле Каляды існуюць пераважна ў фармаце турыстычнага досведу, дзе абрад адаптаваны пад удзел гасцей.

Веткаўскі музей (філіял у Гомелі)

25 снежня, 14:00

У філіяле Веткаўскага музея ў Гомелі Каляды прапануюць асэнсаваць праз камерны фармат майстар-класа. Тут можна зрабіць калядную свечку з вашчыны — просты, але сэнсава насычаны элемент, звязаны з хатняй утульнасцю і чаканнем цуду.

Такі фармат — прыклад таго, як да каляднай традыцыі сёння можна дакрануцца не толькі праз абрад, але і праз асобныя прадметы і практыкі.

«Фальварак Раскоша» (Мядзельскі раён)

Ад 10 снежня па 15 студзеня

У «Фальварку Раскоша» Каляды адзначаюць не ў пэўны час, а па пярэдняй замове. Праграма іх інтэрактыву створаная вакол адноўленага абраду: з каляднымі персанажамі, танцамі, карагодамі і гульнямі.

Наведвальнікам таксама гатуюць традыцыйны абед у карчме, ладзяць майстар-класы і прапануюць заданні і гульні.

Фармат святкавання разлічаны на розныя сцэнары, а пры жаданні можна застацца на ноч.

• 1
• 0
• 0
• 0
• 0
• 0
• 0
• 0