Чым запомніўся Мікіта Мелказёраў — самы папулярны беларускі інтэрв'юер
Мікіта Мелказёраў прайшоў вялікі шлях ад футбольнага журналіста да аднаго з самых паспяховых інтэрв'юераў Беларусі. Яго раптоўна не стала ў ноч на 21 снежня 2025 года.
Нарадзіўся ў Хабараўску, але вырас у Мінску
Першыя пяць гадоў свайго жыцця Мікіта правёў у Расіі. Пасля маці прывезла яго ў Мінск да сваіх бацькоў, а сама вярнулася на год у Хабараўск — афармляць развод ды давучвацца ў магістратуры.
З татам Мікіта апошні раз размаўляў ва ўзросце 11 гадоў — патэлефанаваў сам, каб папрасіць дазвол на выезд за мяжу. З усіх сваякоў па лініі бацькі ў выніку камунікаваў толькі з бабуляй.
Успамінаў пра расійскі перыяд жыцця было не вельмі шмат: «Тата быў старшынёй хабараўскага камсамолу, яго нават у савецкі час па тэліку паказалі. А потым ён стаў займацца бізнэсам, ганяць з Азіі машыны праварульныя. Памятаю, што было шмат ікры, чырвонай рыбы, я яе люблю. Мама расказвала, што ў ардынатарскай у іх стаяў трохлітровы слоік ікры з уторкнутай лыжкай, і ніхто яе не еў».
Думаў пра кар’еру футбаліста
Да 10 класа Мікіта займаўся футболам у ДзЮСШ. Казаў, што ў яго была стараннасць, але не было сапраўднага таленту. Плюс не хапала смеласці, нахабства, каб прабівацца. У раздзявальнях ён дачытваў Дастаеўскага, а пацаны гэтага не разумелі.
У выніку хлопец вырашыў адмовіцца ад мар пра футбол і пачаў рыхтавацца да паступлення на факультэт журналістыкі БДУ.
У маладосці ў Мікіты былі праблемы з залежнасцю. Аднак ён змог узяць сітуацыю пад кантроль і ўрэшце цалкам адмовіўся ад алкаголю.
Сваю кар’еру Мікіта пачынаў як спартыўны журналіст. Працаваў у газеце «Всё про футбол», на інтэрнэт-партале «Трыбуна», затым перайшоў на Onliner.by.
Але на аматарскім узроўні ён працягваў гуляць у футбол і ў дарослым жыцці. Ён быў капітанам у футбольнай каманды Беларускай асацыяцыі журналістаў, на полі займаў пазіцыю цэнтральнага абаронцы.
Не саромеўся называць сябе неафітам
Мікіта шчыра прызнаваўся, што да 2020 года зусім не цікавіўся палітыкай:
«Я з тых, каго называюць неймавернымі ці неафітамі. І так, да 2020‑га мне было даволі роўна, што там адбываецца з краінай. Цяпер я адкрываю ў сябе здольнасці ганарыцца беларускай мовай і кайфаваць ад яе ўжывання і гучання. А таксама адчуваць нейкую моц ад новых ведаў па гісторыі сваёй краіны».
Ён увогуле не вельмі хваляваўся праз тое, што пра яго думаюць. Мікіта казаў: «Я не баюся не ведаць — баюся, што не буду хацець даведацца. Пасля інтэрв'ю ў мяне з'явілася шырэйшае кола знаёмых, людзей з вялікімі ведамі, з якімі я магу параіцца, да каго звярнуцца».
Перайшоў на беларускую мову пасля чэленджу
У 2021 годзе Мікіта аб’явіў чэлендж — калі на яго інстаграм падпішуцца 30 тысяч чалавек, ён запіша выпуск па-беларуску. Многія тады абурыліся, што для кантэнту на роднай мове выстаўляюцца ўмовы.
Але ў выніку Мікіта не толькі запісаў выпуск па-беларуску, але і пачаў актыўна вывучаць беларускую мову і паступова перайшоў на яе. Сваім прыкладам блогер паспрыяў папулярызацыі беларушчыны. На яго ютуб-канале шмат выпускаў выходзіла на беларускай мове, дый у іншых праектах Мікіта размаўляў на ёй.
У 2023-м Мікіта набіў сабе тату на назе з пісьменнікам Уладзімірам Караткевічам і кацянятамі.
Стварыў «Жыццё-маліна»
Мікіта спрабаваў запускаць розныя YouTube-праекты, але самым паспяховым для яго стаў канал «Жыццё-маліна» (на яго зараз падпісана 97 тысяч чалавек).
Стартаваў праект летам 2020 года. Мікіта казаў, што гэта месца, дзе не перашкаджаюць гаварыць і паказваюць беларусаў для беларусаў. Удзельнікамі праекта былі Святлана Ціханоўская, Павел Латушка, Зянон Пазняк, Вольга Хіжынкова, Алена Леўчанка, Арцём Шрайбман, Аляксандра Герасіменя, Вадзім Пракоп'еў, Антон Матолька, Мікалай Халезін і многія іншыя.
Найбольш праглядаў — больш за 1,1 мільёна — набрала размова Мелказёрава з беларускім добраахвотнікам Янкі.
Пабраўся шлюбам з мадэллю Лінай Цапавай
Мікіта і Ліна Цапава пазнаёміліся праз інстаграм у 2022 годзе. Калі Ліна перабралася ў Варшаву, то ў іх завязаліся адносіны.
Пара афіцыйна ажанілася ў студзені 2025 года — распісаліся анлайн у ЗША, у штаце Юта.
Мікіта з Лінай завялі мілага шчанюка пароды пці-брабансон. Гадаванец атрымаў прозвішча Фуджы. Мікіта з захапленнем расказваў пра новага сябра ў сацсетках.
Яго кроксы забраў музей
Нядаўна Мелказёраў перадаў свае запамінальныя жоўтыя кроксы ў Музей вольнай Беларусі. Ён расказваў, што абутак прахудзіўся і жонка казала, што пара выкінуць. Мікіта ж жартам напісаў у музей, ці не трэба ім такі экспанат. Музей прыняў кроксы.
-
«Лукашэнку нельга назваць нават малодшым партнёрам Пуціна». Кіт Келаг расказаў пра ролю Лукашэнкі ў перамовах ЗША і Расіі
-
У Барысаве дзяцел заняўся дызайнам фасадаў і не дае жыхарам зранку спаць
-
«Так званая постпенітэнцыярная адаптацыя». Дэпартаваны палітвязень Кірыла Пазняк апублікаваў сваё ФОТА з дочкамі
Каментары
тое самае кажа і мой з сібірскімі каранямі муж, што чырвоная ікра ў іх была трохлітровымі слоікамі