У Мінску адкрыўся рэстаран беларускай кухні з памылкай у назве. Атрымалася двухсэнсоўна
У сталіцы недалёка ад станцыі метро «Партызанская» адкрыўся рэстаран класічнай беларускай кухні. Аднак месца прыцягнула ўвагу не столькі дранікамі, колькі сваёй шыльдай: у беларускай назве ўстановы грубая граматычная памылка, якая выклікае неадназначныя асацыяцыі.
Рэстаран адкрыўся ў Заводскім раёне, на Партызанскім праспекце, 87. Месца добра знаёмае мясцовым жыхарам: раней у гэтым памяшканні доўгі час працавала піцэрыя «Планета Pizza».
Грубая памылка і двухсэнсоўны падтэкст
Новы рэстаран атрымаў назву «Белы гусь», што з пункту гледжання нормаў беларускай мовы з’яўляецца памылкай. У беларускай мове назоўнік «гусь» заўсёды жаночага роду. Адпаведна, правільна назва павінна была б гучаць як «Белая гусь». Самец гусі па-беларуску называецца «гусак», а ўжыванне слова «гусь» у мужчынскім родзе ўласцівае выключна рускай мове.
Такая памылка выглядае асабліва пікантна ў сучасным палітычным кантэксце. Пасля 2020 года беларускія сілавікі і прарасійскія актывісты пачалі ўжываць фразу «жуе белы гусь» як здзеклівае перакручванне патрыятычнага лозунга «Жыве Беларусь». Ці з’яўляецца гэта свядомай правакацыяй ці ж усяго толькі супадзенне праз памылку — застаецца толькі здагадвацца.
Беларуская кухня па-руску
Нягледзячы на тое, што ўстанова пазіцыянуе сябе як рэстаран роднай кухні, знайсці ў ім беларускую мову амаль немагчыма. Сацыяльныя сеткі ўстановы вядуцца выключна па-руску, меню таксама складзена па-руску.
У меню рэстарана прапануецца сумесь класічных беларускіх страў — такіх як дранікі, мачанка і калдуны — і савецкай ды еўрапейскай кухні: аліўе, селядзец пад шубай і запечаныя слімакі.
Цэны ў рэстаране сярэднія:
- Дранікі са смятанай — 13 рублёў.
- Мачанка з блінамі ці дранікамі — 24 рублі.
- Калдуны з мясам — 18 рублёў.
- Судак з груцай — 28 рублёў.
- «Панскі боршч» — 17 рублёў.
Сярод найбольш дарагіх пазіцый, напрыклад, галёнка ў піве за 42 рублі ці «Сэт 6 сотак» (настойкі з закускай) за 55 рублёў.
Інтэр'ер як «гняздо»
Што тычыцца афармлення, то стваральнікі паспрабавалі зрабіць стаўку на ўтульнасць і казачнасць. Інтэр'ер стылізаваны пад сельскую хату ці нават «гняздо»: фактурныя ляпныя сцены, вялікія пухнатыя свяцільні ручной працы, маленькія лямпы ў выглядзе палавінак яек і штучны камін.
Установа разлічана прыкладна на 60 пасадачных месцаў і знаходзіцца ў раёне, які сапраўды не перанасычаны месцамі для адпачынку.
«Наша Нiва» — бастыён беларушчыны
ПАДТРЫМАЦЬЦяпер чытаюць
«У сына на тэлефоне былі налепленыя сцяг і герб Расіі. З гэтага ўсё пачалося». Бацька школьніка з Баранавіч расказаў, як яго сына цкавалі аднакласнікі27
Каментары
Ну памылка ў назве, ужо не душніце калі ласка. Ці мы ўсе такія ўжо бездакорна пісьменныя?
Сацыяльныя сеткі па-расейску, дык што тут дзіўнага на сёняшні дзень?