Міністэрства ўнутраных спраў Нікарагуа заявіла ў суботу, што краіна вызваліць дзясяткі зняволеных. Гэта адбываецца на фоне ўзмацнення ціску Злучаных Штатаў на прэзідэнта Даніэля Артэгу праз тыдзень пасля звяржэння былога лідара Венесуэлы Нікаласа Мадура, піша AP.
У пятніцу амбасада ЗША ў Нікарагуа адзначыла, што Венесуэла зрабіла важны крок да міру, вызваліўшы палітычных зняволеных. Разам з тым дыпламаты выказалі жаль, што ў Нікарагуа «больш за 60 чалавек застаюцца несправядліва затрыманымі або зніклымі без вестак, сярод іх — пастары, рэлігійныя дзеячы, хворыя і людзі сталага веку».
У суботу Міністэрства ўнутраных спраў Нікарагуа паведаміла ў афіцыйнай заяве, што «дзясяткі асоб, якія знаходзіліся ў Нацыянальнай пенітэнцыярнай сістэме, вяртаюцца ў свае дамы і сем'і».
Пакуль да канца не зразумела, хто менавіта быў вызвалены і на якіх умовах.
Улады краіны праводзяць пастаянныя рэпрэсіі пасля масавых пратэстаў 2018 года, якія былі жорстка падаўлены.
Рэжым знявольваў апанентаў, рэлігійных лідараў, журналістаў і іншых актывістаў, пасля чаго адпраўляў іх у выгнанне, пазбаўляючы сотні людзей маёмасці і нікарагуанскага грамадзянства.
З 2018 года ў краіне было закрыта больш за 5000 арганізацый, пераважна рэлігійных, што вымусіла тысячы людзей пакінуць радзіму.
Урад Нікарагуа часта абвінавачвае крытыкаў і апанентаў у змове супраць дзяржаўнай улады.
У апошнія гады афіцыйны Манагуа вызваліў сотні зняволеных палітычных апанентаў і актывістаў, аднак адначасова пазбавіў іх грамадзянства і выслаў у іншыя краіны, у прыватнасці ў ЗША і Гватэмалу. Назіральнікі назвалі гэта спробай «умыць рукі» ад апазіцыі і нівеліраваць міжнародную крытыку ў галіне правоў чалавека. Многія з гэтых нікарагуанцаў апынуліся ў стане апатрыдызму (адсутнасці грамадзянства).
У суботу ў сацыяльнай сетцы X Бюро па справах Заходняга паўшар'я Дзярждэпартамента ЗША зноў выступіла з крытыкай у адрас урада Нікарагуа. «Нікарагуанцы галасавалі за прэзідэнта ў 2006 годзе, а не за нелегітымную пажыццёвую дынастыю», — гаворыцца ў паведамленні.
Дані Рамірэс-Аердыс, выканаўчы сакратар нікарагуанскай праваабарончай арганізацыі CADILH, прызнаўся, што навіна пра вызваленне выклікала ў яго неадназначныя пачуцці. «З аднаго боку, я рады. Кожны палітычны зняволены цярпіць тую ці іншую форму катаванняў. Але з іншага боку, я ведаю, што гэтыя людзі і іх сем'і будуць і далей падвяргацца пераследу, сачэнню і паліцэйскаму кантролю».
Рамірэс-Аердыс адзначыў, што вызваленне зняволеных з'яўляецца рэакцыяй на ціск з боку Злучаных Штатаў.
«Унутры рэжыму напэўна існуе вялікі страх, што ЗША могуць цалкам дэмантаваць яго», — падсумаваў ён.
Тым часам, у Венесуэле адпушчаныя на волю яшчэ дзевяць палітвязняў. Колькасць вызваленых палітвязняў у Венесуэле вырасла да 18 чалавек, паведамляе агенцтва Reuters са спасылкай на праваабарончыя арганізацыі.
Паводле ацэнак праваабарончай арганізацыі Foro Penal, у Венесуэле налічваецца 811 палітычных зняволеных.
Каментары