Мінчук забіў маці і цесця, а пасля 15 гадоў атрымліваў за іх пенсію
У Мінску перад судом паўстане 57‑гадовы мужчына, якога абвінавачваюць у забойстве двух чалавек, што знаходзіліся ў бездапаможным стане, а таксама ў буйным і асабліва буйным махлярстве. Пра гэта паведамілі ў Генеральнай пракуратуры Беларусі.
Паводле матэрыялаў справы, у 2006 годзе падчас сваркі мужчына задушыў сваю маці. Каб схаваць злачынства, ён расчляніў цела з дапамогай нажа. Пасля гэтага на працягу двух гадоў ён, выкарыстоўваючы даверанасць, атрымліваў на пошце пенсію забітай маці. Такім чынам ён незаконна завалодаў сродкамі на суму больш за тысячу рублёў (з улікам дэнамінацыі).
Адчуўшы беспакаранасць, мужчына неўзабаве здзейсніў яшчэ адно злачынства. Улетку 2009 года, ён сп'яну пасварыўся з 70‑гадовым цесцем, з якім жыў у адной кватэры. Нанёс яму ўдары па руках і твары, а пасля не менш за пяць удараў сякерай па галаве. Пенсіянер памёр на месцы.
З целам другой ахвяры мужчына зрабіў гэтаксама: расчляніў яго з дапамогай нажа і сякеры, запакаваў часткі цела ў пакеты і закапаў у адным з паркаў Мінска. Парэшткі знайшлі толькі летам 2025 года.
Пасля забойства цесця абвінавачаны з 2009 па 2022 год, выкарыстоўваючы пашпарт загінулага, падбіраў людзей, падобных да яго па выглядзе, якія атрымлівалі на поштах пенсію і матэрыяльную дапамогу. У выніку ён такім чынам незаконна завалодаў больш як 53 тысячамі рублёў.
Падчас следства мужчына цалкам прызнаў сваю віну і даў падрабязныя паказанні. Крымінальная справа накіраваная ў суд, абвінавачаны знаходзіцца пад вартай.
У Гомелі раскрылі забойства дзевяцігадовай дзяўчынкі, здзейсненае ў 1991-м. Яе забіў 11‑гадовы брат
Забойства ветэрана вайны ў 2007 годзе раскрылі толькі цяпер
Адно з забойстваў у Беларусі раскрылі амаль праз 50 гадоў
«Асноўны інструмент — генетычная экспертыза». У Следчым камітэце расказалі, як раскрываюць забойствы даўно мінулых гадоў
Справа ліфцёра. Сталі вядомыя новыя падрабязнасці справы маньяка з Магілёва
Каментары