Брытанская разведка: У баях за Купянск суадносіны страт Расіі і Украіны склалі 27 да 1
Брытанцы адзначаюць істотную тактычную перавагу ўкраінскіх падраздзяленняў. На гэты момант Сілы абароны замацаваліся ў цэнтральнай частцы горада, аднак поўная зачыстка горада можа заняць яшчэ паўгода.
Купянск (націск на першы склад: КУпянск) — важны чыгуначны і лагістычны вузел у Харкаўскай вобласці. Першы раз Расія захапіла яго 27 лютага 2022 года, на чацвёрты дзень вайны. Але страціла яго падчас украінскага контрнаступу ў верасні таго ж года.
Мінулым летам, калі асноўныя сілы Украіны былі засяроджаны на іншых участках фронту, Расія знайшла слабыя месцы ў абароне Купянска. Раптоўны націск заспеў украінскія войскі знянацку, і фронт ледзь не абваліўся. Аднак пры канцы 2025 года ўкраінцы правялі тут паспяховую контрнаступальную аперацыю.
Як піша The Washington Post, контрнаступ на паўночным усходзе стаў адным з нямногіх прасоўванняў УСУ за апошні год. І ён даказвае, што Сілы абароны здольныя адкінуць расійскія войскі пры ўмове належнага ўзбраення і арганізацыі.
Украіна тэрмінова перакінула ў горад спецыялізаваныя падраздзяленні беспілотнікаў і пяхоты, вярнуўшы ініцыятыву. Цяпер камандзіры кажуць, што яны займаюцца місіямі тыпу «знайсці і знішчыць», зачышчаючы горад ад рэшткаў расійскіх салдат (якіх, паводле ацэнак, засталося не менш за 100) і спыняючы новыя спробы пераправы цераз раку Аскол.
Нягледзячы на поспехі, вулічныя баі ў цэнтры горада працягваюцца. Маленькія групы салдат з абодвух бакоў залежаць ад забеспячэння дронамі, бо падвозіць рэсурсы тэхнікай занадта небяспечна. Расійскія войскі выкарыстоўваюць для пранікнення ў горад самыя розныя спосабы: ад надзіманых лодак на рацэ Аскол да труб закінутага газаправода.
Расійскія салдаты часам праходзяць да 15 кіламетраў пад зямлёй па трубах, выкарыстоўваючы электрасамакаты, каб паскорыць рух. Некаторыя выходзяць з трубы з прыкметамі хімічнага атручэння.
Як піша The Times, агульныя страты акупантаў у раёне Купянска за мінулы год вымяраюцца тысячамі. Падчас брыфінгу для вайсковага кіраўніцтва Вялікабрытаніі на мінулым тыдні былі агучаны ашаламляльныя лічбы: падчас баёў за горад украінскія сілы знішчылі ў 27 разоў больш расійскіх салдат, чым страцілі самі.
Кіраўнік Украінскага цэнтра бяспекі і супрацоўніцтва Сяргей Кузан у каментары для 24tv.ua адзначыў: лічбы брытанскай разведкі, хутчэй за ўсё, тычацца канкрэтных этапаў аперацыі ў Купянску. Менавіта гэтым і тлумачацца такія шакуючыя суадносіны страт, якія сапраўды маглі мець месца ў асобныя перыяды баёў.
Крыніцы ў абаронным ведамстве паведамляюць, што напярэдадні Калядаў украінскія войскі акружылі каля 200 расійскіх салдат. Частка акружаных расійскіх вайскоўцаў знаходзілася ў Купянскай цэнтральнай гарадской бальніцы. Па іх быў нанесены ўдар украінскай авіябомбай.
Для ўзмацнення абароны горада, які яшчэ некалькі тыдняў таму знаходзіўся пад пагрозай захопу, былі перакінутыя адны з найлепш падрыхтаваных падраздзяленняў, у тым ліку 13‑я брыгада Нацгвардыі «Хартыя».
Па ацэнках украінскіх вайскоўцаў, поўная зачыстка горада можа заняць яшчэ месяцы з-за складанасці выяўлення расійскіх салдат, якія хаваюцца ў падвалах і руінах, без стварэння рызыкі для жыцця ўкраінскіх вайскоўцаў. Зачыстка кожнага дома ўскладняецца тым, што над горадам увесь час кружляюць дзясяткі расійскіх дронаў.
19 студзеня камандуючы Нацгвардыі Аляксандр Піўненка заявіў, што ўкраінскія падраздзяленні кантралююць цэнтральную частку Купянска і будынак гарадской рады.
Цяпер чытаюць
26‑гадовага супрацоўніка элітнага падраздзялення мытні асудзілі на 16 гадоў па наборы палітартыкулаў. Сярод іх і «здрада дзяржаве»4
Каментары