Дзве ўкраінкі паехалі да стэлы ў Купянску, каб даказаць, што Зяленскі сапраўды там быў ВІДЭА
Публікацыя Уладзімірам Зяленскім відэа з Купянска выклікала хвалю спрэчак і нязграбных спроб зняпраўджвання з боку расійскіх рэсурсаў. Кропку ў гісторыі паставілі дзве ўкраінкі, якія апублікавалі сваё відэа з таго ж месца.
12 снежня прэзідэнт Украіны апублікаваў сэлфі-відэа на фоне ўязной стэлы Купянска. Яно было знятае на тэлефон iPhone17 Pro, які з'явіўся ў продажы некалькі месяцаў назад. Зяленскі паведаміў пра наведванне перадавога каманднага пункта 14‑й асобнай механізаванай брыгады. Паводле звестак OSINT-даследчыкаў, месца здымкаў знаходзілася ў непасрэднай блізкасці да фронту: прыкладна за 1,15 км ад расійскіх пазіцый і ўсяго за 500 метраў ад так званай «шэрай зоны».
Адразу пасля публікацыі расійскія блогеры і СМІ пачалі сцвярджаць, што ролік стары, а візіт — інсцэніроўка. Яны даказвалі, што відэа знятае яшчэ ў 2022 годзе, але не звярталі ўвагу на новы тэлефон у кадры.
У якасці галоўнага доказу яны падавалі кадры з расійскага выведвальнага беспілотніка, зробленыя, як сцвярджалася, на наступную раніцу пасля візіту.
На гэтых кадрах ахоўныя сеткі разарваныя, у той час як на відэа Зяленскага яны выглядаюць практычна цэлымі. Таксама істотна адрозніваецца і сама стэла, якая на новых здымках мае значна больш пашкоджанняў.
Праз некалькі дзён у сеціве з'явілася новае відэа. Яго аўтаркі — дзве дзяўчыны, якія, верагодна, маюць дачыненне да Сіл абароны (у кадр трапляе вайсковая кофта адной з іх).
Дзяўчына за кадрам выразна пазначае час:
«Зяленскі быў учора ў Купянску, мы з Наталкай таксама зганяем сёння».
На кадрах, знятых дзяўчатамі, сапраўды відаць, што стэла выглядае інакш. Часткі літар адсутнічаюць, канструкцыя моцна пасечана асколкамі. Відавочна, што па ёй быў нанесены масаваны ўдар ужо пасля ад'езду Зяленскага. Ахоўная сетка таксама моцна пашкоджаная. У кадр трапляюць і разбітыя аўтамабілі — аўтарка відэа ўдакладняе, што яны належалі ўкраінскім абаронцам.
Важным элементам, які аб'ядноўвае абодва сюжэты, стаў варожы БПЛА. На відэа Зяленскага ў яшчэ цэлай ахоўнай сетцы выразна бачны заблытаны беспілотнік. Дзяўчаты таксама акцэнтуюць увагу на аналагічным беспілотніку, які вісіць у рэштках ужо пашкоджанай сеткі.
«І ён яшчэ насілкаваны», — каментуе дзяўчына, паказваючы на пагрозу.
Здымка ледзь не скончылася трагічна. Праз некалькі хвілін пасля прыбыцця дэтэктар зайшоўся трывожным піскам — да дзяўчат набліжаўся актыўны дрон.
Пад крыкі «Шуміць! Ляціць нешта! Уцякайма!» дзяўчаты кінуліся наўцёкі. У апошняй частцы відэа — кадры панічнай эвакуацыі пад піск дэтэктара і эмацыйную лексіку кіроўцы.
Мяркуючы з таго, што відэа трапіла ў інтэрнэт, адважным жанчынам удалося адарвацца ад пагоні.
Цяпер чытаюць
«Цяпер мне чужая сама канцэпцыя ўжыць нешта, чаго ты не ведаеш». Вялікая гутарка з Іванам Шылам пра бізнэс, зараблянне з дапамогай ШІ, жанчын і ботакс18
Каментары
Пакуль лічыцца за зеленскім.