«У гэтага павінна быць нейкае другое дно». Чэмпіён Польшчы па боксе раптоўна з’ехаў у Беларусь, кінуўшы нават свае ўзнагароды
Уладальнік тытула міжнароднага чэмпіёна Польшчы па боксе Яўген Макарчук, 32‑гадовы ўраджэнец Ліды, які яшчэ нядаўна заяўляў пра жаданне выступаць пад польскім сцягам, нечакана вярнуўся ў Беларусь. Былыя заступнікі спартсмена падазраюць, што за ягоным бесперашкодным вяртаннем і працягам кар’еры можа стаяць супрацоўніцтва з беларускімі сілавымі структурамі, піша «Люстэрка» на падставе паведамленняў польскай прэсы.
Макарчук пераехаў у Польшчу восенню 2022 года і неўзабаве стаў выступаць на рынгу ў гэтай краіне. Ён вучыў польскую мову, меў намер атрымаць грамадзянства.
«У маёй сям’і нас з пакалення ў пакаленне выхоўвалі ў духу польскасці. Дагэтуль мы з блізкімі падтрымліваем польскія традыцыі і звычаі. […] Мне падабаецца ў Польшчы, я адчуваю сябе тут як дома. Я паляк. Мая мара — заваяваць пояс чэмпіёна свету для Польшчы», — казаў баксёр у інтэрв’ю яшчэ восенню 2024 года.
Аднак, як высветлілася, неўзабаве пасля гэтых слоў паводзіны спартсмена змяніліся, а затым ён і зусім знік. Дзяніс Звонік, кіраўнік фонду, які дапамагаў Макарчуку з пераездам і грашыма, не хавае эмоцый:
«Мы забяспечылі Яўгену фінансаванне, жыллё, харчаванне, але, на жаль, як бачна, ён гэтага не цаніў. Ён з’ехаў, пакінуўшы пасля сябе фінансавыя абавязацельствы не толькі перад мной, але і перад трэнерамі і менеджарам».
Знікненне было раптоўным, баксёр нікога не праінфармаваў пра ад’езд.
«Пры канцы снежня 2024 года з Яўгенам ужо не было ніякай сувязі. … Калі ён знік без слова, я быў шакаваны і адчуваў агіду. Мы ж у рэшце рэшт столькі сілаў на яго патрацілі. Гэта была велізарная праца, але, на жаль, такое рашэнне ён прыняў».
Менеджар Віктар Матэран дадаў дэталь, якая здзівіла каманду больш за ўсё: ён пакінуў усе свае рэчы, нават самае каштоўнае для любога спартоўца.
«Гэта было для нас вельмі дзіўна, бо хто пераязджае, той хутчэй забірае з сабой сваю маёмасць, праўда? Ён пакінуў нават свае паясы, якія заваяваў на рынгу!» — абурыўся Матэран.
Паводле слоў прамоўтара Марыюша Грабоўскага, Макарчук першапачаткова, калі прыехаў у Польшчу, казаў, што не можа вярнуцца ў родную краіну.
«Калі ён сапраўды вярнуўся ў Беларусь, у гэтага павінна быць нейкае другое дно», — адзначыў прамоўтар.
Пры гэтым неўзабаве пасля «знікнення» пацвердзілася, што Макарчук знаходзіцца ў Беларусі, на волі, і нават падарожнічае. У ягоных сацсетках з’явіліся відэа трэніровак з Мінска, кадры з Дубая, бо ён ездзіў у ААЭ, а ў канцы 2025 года нават правёў бой у Германіі. Такая свабода перамяшчэння выклікала падазрэнні ў Артура Кондрата, кіраўніка арганізацыі, якая падтрымлівае палякаў у краінах на ўсход ад Польшчы.
«Дастаткова ўсяго трох месяцаў па-за краінай, каб пры спробе ўезду ў Беларусь трапіць на шматагадзінны допыт. Правяраецца ўсё: тэлефоны, кантакты, фота, сацсеткі. Ліда — маленькі горад, а пра поспехі Макарчука пісаў, напрыклад, Саюз палякаў Беларусі. Ён там вельмі вядомы. Няма магчымасці, каб беларускія службы не ўзялі яго на допыт».
На яго думку, без здзелкі з сілавікамі далейшая кар’ера баксёра была б немагчымая:
«Калі б ён не пайшоў у нейкім аб’ёме на супрацоўніцтва, то, хутчэй за ўсё, не выехаў бы ў Дубай, а пазней у Германію. … Той факт, што Макарчук прадстаўляў Польшчу, не маглі яму вось так проста прабачыць. Раз ён перамяшчаецца па свеце, высокая імавернасць таго, што ён мог пайсці на супрацоўніцтва, бо ў адваротным выпадку ў яго маглі б быць сур’ёзныя праблемы з законам», — лічыць Артур Кондрат.
Польскі саюз боксу на запыты польскіх журналістаў і зварот асацыяцыі не адказаў, як і сам спартовец.
«Толькі тры чалавекі будуць ведаць пра вас. Самы першы чалавек краіны». З'явіліся запісы размоў шпіёнкі Іны Кардаш з куратарам
У Кіеве за шпіянаж арыштавалі беларускую журналістку Іну Кардаш. Кажуць, з 2015 года яна працавала на КДБ
Анатоль Вайцяхоўскі спакойна прыехаў у Беларусь рэйсавым аўтобусам
Актывіст з Беластока, які цішком вярнуўся ў Беларусь, быў у кіраўніцтве «Народнай грамады»
Беласток на вушах праз знікненне актывіста Вайцяхоўскага, суседа памерлага шпіёна Усера. А той цішком вярнуўся ў Беларусь
Каментары