Беласток на вушах праз знікненне актывіста Вайцяхоўскага, суседа памерлага шпіёна Усера. А той цішком вярнуўся ў Беларусь

Актывісты Беластока забілі трывогу: знік прадпрымальнік і заснавальнік папулярнай у 1990‑я баранавіцкай газеты «Шаг» Анатоль Вайцяхоўскі, які пасля пратэстаў 2020 года выехаў у эміграцыю.

Мясцовыя заўважылі, што мужчына перастаў з’яўляцца на працы ў таксі пасля таго, як памёр яго экс-сусед па кватэры Уладзімір Усер. Нагадаем, той знаходзіўся ў Польшчы пад следствам па справе аб шпіянажы.

Аднак, як стала вядома «Нашай Ніве», пакуль у Беластоку панічна шукалі Анатоля Вайцяхоўскага, уяўляючы самыя розныя версіі знікнення, ён знайшоўся ў Беларусі.

Павялічыць

У лістападзе 2025‑га ў беластоцкую кватэру, дзе Вайцяхоўскі жыў разам з 69‑гадовым бабруйчанінам Уладзімірам Усерам (Лазаравым) уварваліся восем чалавек са зброяй і ў бронекамізэльках — гэта былі польскія спецслужбы. У кватэры правялі ператрус, а Лазарава забралі па падазрэнні ў шпіянажы. Аднак неўзабаве ён памёр: спынілася сэрца.

Да шпіянажнай гісторыі абодва суседы ўляпаліся ў прапагандысцкі фільм БТ. Па замове прапагандыстаў, якія назваліся актывістамі з Вільні, якія хочуць дапамагчы з фінансаваннем тым, каму цяжка ў эміграцыі, Вайцяхоўскі і Усер запісалі відэа, у якім расказалі пра ўсе мінусы жыцця ў замежжы.

Анатоль Вайцяхоўскі тады сцвярджаў, што трапіў у фільм «Чужое неба» памылкова, бо даверыўся суседу. Абодва зарабілі на фільме па 50 еўра.

Беластоцкія актывісты распавялі, што Вайцяхоўскі нечакана знік каля месяца таму (праз суткі пасля таго, як Усер памёр у шэлтары). Анатоль выдаліў свой профіль у тэлеграме, выключыў тэлефон і перастаў выходзіць на працу ў таксі.

Паспрабавалі датэлефанавацца да жонкі Анатоля Таццяны, якая працягвала жыць у Беларусі. Падчас размовы жанчына вяла сябе падазрона: няўпэўнена прамовіла, што з Анатолем яны даўно ў разводзе і яна нічога пра яго лёс не ведае. Пры гэтым у яе інстаграме было мноства фота і відэа з водпуску з мужам, якія датаваліся 2025 годам. Пасля гэтага званок перарваўся, і ўжо наступным разам слухаўку падняў сам Анатоль, які паспеў распавесці, што ён «адпачывае ў сваякоў». На пытанне ж, чаму ён з’ехаў з Польшчы і ці плануе вяртацца, мужчына кінуў трубку.

Павялічыць

Да паслявыбарчых пратэстаў 2020 года мужчына з сям’ёй жыў у Баранавічах, пэўны час працаваў на раённым вузле электрасувязі. У сярэдзіне 1990‑х Вайцяхоўскі стаў адным з заснавальнікаў мясцовай газеты «Шаг». Гэта адна з першых прыватных газет горада і некалі адна з самых папулярных, яе наклад сягаў 11 тысяч экзэмпляраў. Пазней яна перафарматавалася ў чыста рэкламную. У пачатку 2000‑х Вайцяхоўскі сышоў з журналістыкі, стаў прадпрымальнікам. Ён займаўся медыцынай і таварамі для здароўя.

У 2023 годзе Вайцяхоўскага затрымаў ГУБАЗіК — за тое, што Анатоль пакідаў у тэлеграме каментарыі супраць расійскага ўварвання ва Украіну і гвалту сілавікоў, але калі яго выпусцілі, ён аператыўна эвакуяваўся за мяжу пры дапамозе «Байсола».

• 6
• 3
• 6
• 43
• 5
• 1
• 2
• 0