Гамяльчанка стала сурагатнай мамай, каб забяспечыць сваё дзіця, а былы муж адсудзіў большую частку ганарару
Жанчына вырашыла стаць сурагатнай маці, каб забяспечыць уласнае дзіця пасля таго, як яе кінуў муж. Але спачатку немаўля, якое яна выношвала для іншай пары, памерла ад сіндрому раптоўнай смерці, а потым былы муж праз суд запатрабаваў палову ганарару.
У рэдакцыю «Моцных Навін» звярнулася Таццяна (імя зменена). Яе гісторыя — не з шараговых: жанчына наважылася на сурагатнае мацярынства, каб зарабіць на ўтрыманне свайго дзіцяці. Многія не ведаюць, але ў Беларусі яно дазволена, рэгулюецца законам «Аб дапаможных рэпрадуктыўных тэхналогіях» і лічыцца адным з іх відаў нароўні з ЭКА.
Таццяна кажа, што да рашэння яе падштурхнула адсутнасць фінансавай дапамогі на дзіця ад мужа, які сышоў да іншай жанчыны. На жаль, гісторыя з цяжарнасцю скончылася трагічна, але і пасля гэтага няшчасці сурагатнай мамы не скончыліся. Паводле слоў суразмоўцы, яна хоча папярэдзіць усіх жанчын, якія плануюць уступіць у праграму сурмацярынства: калі ёсць праблемы ў сямейных адносінах, іх трэба вырашыць «на беразе».
«Зацяжарыла праз ЭКА ў 2023 годзе»
Дакументальна Таццяна аформіла з мужам Кірылам (імя таксама змянілі) развод толькі год таму, але фактычна шлюб распаўся яшчэ ў 2023-м, калі яна даведалася, што ў мужа ёсць іншая жанчына. Пэўны час пара яшчэ жыла пад адным дахам, але муж паступова перавозіў рэчы да новай дзяўчыны.
Грошай не хапала, і менавіта гэта заахвоціла жанчыну зарабіць на сурагатным мацярынстве.
— Далучылася да праграмы сурагатнага мацярынства ў мінскай кампаніі, прайшла ўсе абследаванні і зацяжарыла праз ЭКА ў 2023 годзе. На той момант муж яшчэ не канчаткова пакінуў наш дом, але пра сурагатную цяжарнасць не ведаў. Зрэшты, мы ўжо не жылі як муж і жонка, інтымных адносін паміж намі не было.
Таццяна прайшла абследаванні і пазнаёмілася з біялагічнымі бацькамі, гэта аказалася пара з Расіі. Сурагатнай маме перасадзілі два эмбрыёны. Прыжыўся адзін, Таццяна пачала выношваць дзіця.
Згодна з дамовай, заверанай у натарыуса, за гэта ёй належала ўзнагароджанне 14 300 даляраў.
Урачы канстатавалі раптоўную смерць
Роды адбыліся на 37‑м тыдні цяжарнасці, але, на жаль, немаўля памерла. Прычынай назвалі сіндром раптоўнай дзіцячай смерці: як патлумачылі медыкі, такое здараецца, пакуль дзіця занадта малое і мышцы ў яго не развітыя — яно як бы «забываецца» дыхаць.
Таццяна кажа, што з біялагічнымі бацькамі яна пасябравала і камунікуе да гэтага часу. Дзіця яна вынасіла — так што ёй заплацілі частку сумы — 9 тысяч даляраў.
Тым часам адносіны Таццяны з Кірылам станавіліся ўсё горшымі.
Кірыл падаў у суд — вырашыў забраць палову ганарару, атрыманага за сурагатную цяжарнасць. На момант аплаты паслуг Таццяны як сурмамы яна з Кірылам яшчэ знаходзілася ў шлюбе, а значыць, грошы лічыліся сумесна нажытымі.
Кірыл выйграў суд — паводле яго рашэння Таццяна павінна аддаць яму 7500 даляраў.
Як выйшла, што былы муж забраў большую частку ганарару? Справа ў тым, што ў натарыяльнай дамове значыліся тыя самыя 14 300 тысяч даляраў — іх палову мужчына і адсудзіў. Зрэшты, Таццяна кажа, што пасля паўтара года нервовых судовых пасяджэнняў сама здалася і пагадзілася аддаць грошы. Былая пара заключыла міравое пагадненне.
— Я працую і паціху іх выплачваю. Хачу сваім прыкладам папярэдзіць жанчын, якія задумваюцца стаць сурагатнай маці: вось так былыя мужы могуць адабраць сабе частку грошай. Не паўтарайце маю памылку і прадумайце свае крокі, калі ў вас адносіны з партнёрам дрэнныя, — падсумоўвае Таццяна.
Хто забараняе ў Беларусі кнігі — вось гэтыя 22 чалавекі33
Хто забараняе ў Беларусі кнігі — вось гэтыя 22 чалавекі
«Спасибо, Лена! Продолжайте вести наблюдение». Афіцэр, які пісаў Харысавай, пасвіўся ў чатах палітэміграцыі, а некаторым дзяўчатам нават прапаноўваў абмяняцца нюдсамі9191
Каментары