У ЗША падрыхтавалі новыя санкцыі супраць Расіі на выпадак правалу перамоў
Адміністрацыя прэзідэнта ЗША Дональда Трампа падрыхтавала новыя санкцыі супраць Расіі, але пакуль не спяшаецца іх увесці. Пра гэта паведамілі агенцтву Bloomberg еўрапейскія чыноўнікі, знаёмыя з сітуацыяй.
Усе цяпер сочаць за мірнымі перамовамі паміж Расіяй, ЗША і Украінай, аднак у Еўропе ўзрастае скепсіс адносна іх поспеху. Суразмоўцы адзначылі, што Масква, не дасягнуўшы вынікаў на полі бою, узмацніла ціск на Кіеў і спрабуе прымусіць яго прыняць нявыгадную дамову праз масавыя ўдары па энергетычнай інфраструктуры.
Вашынгтон пачаў рыхтаваць новыя санкцыі яшчэ ў снежні на выпадак, калі мірныя перамовы праваляцца. Абмяркоўваліся абмежаванні для расійскага энергетычнага сектара, а таксама меры супраць так званага «ценявога флоту» для перавозкі нафты і супраць трэйдараў, якія спрыяюць продажу расійскага паліва. Міністр фінансаў ЗША Скот Бесент абмяркоўваў гэтыя планы з групай еўрапейскіх амбасадараў, аднак канчатковае рашэнне пра санкцыі прымае прэзідэнт.
За год на пасадзе Трамп увёў абмежаванні толькі супраць «Раснафты» і «Лукойла» — пасля няўдалай спробы правесці двухбаковую сустрэчу з Пуціным у Будапешце ў кастрычніку мінулага года. Пасля гэтага ЗША прадставілі мірны план і ўзгаднілі яго з Украінай і ЕС. Прэзідэнт Украіны Уладзімір Зяленскі адзначаў, што адзіным нявырашаным пытаннем застаецца тэрытарыяльнае. Прэзідэнт Расіі Уладзімір Пуцін патрабуе вывесці войскі Украіны з неакупаванай часткі Данбаса і перадаць рэгіён пад кантроль Масквы, што для Кіева непрымальна.
23—24 студзеня ў Абу-Дабі прайшоў першы раўнд трохбаковых перамоў Расіі, ЗША і Украіны, другі раўнд запланаваны на 4—5 лютага ў закрытым фармаце. У Крамлі заявілі, што гатовыя да мірнага ўрэгулявання, але толькі калі Кіеў прыме «адпаведныя рашэнні» адносна тэрыторый. Трамп адзначыў, што прасіў Пуціна не біць па ўкраінскай энергетычнай інфраструктуры перад пачаткам перамоў, але Масква не рабіла гэтага толькі пару дзён.
Цяпер чытаюць
Стала вядомае імя другой беларускі, якая згінула пад селем у Непале. Гэта 24‑гадовая Ірына з журфака БДУ6
Стала вядомае імя другой беларускі, якая згінула пад селем у Непале. Гэта 24‑гадовая Ірына з журфака БДУ
Электронную «Беларускую энцыклапедыю», створаную як прастору «верагодных ведаў пра Беларусь», ціха ліквідавалі разам з рэдакцыяй. Купу артыкулаў перадалі Гігіну66
Каментары