На перамовах у Абу-Дабі прадстаўнікі Пуціна зноў патрабуюць ад Украіны аддаць увесь Данбас
Паводле інфармацыі агенцтва Reuters, расійская дэлегацыя на перамовах з Украінай і ЗША, якія праходзяць у Абу-Дабі (ААЭ), зноў настойвае на перадачы Расіі ўсяго Данбаса, у тым ліку тых тэрыторый, якія Масква не змагла ўзяць пад кантроль за амаль чатыры гады вайны. Пра гэта агенцтву паведаміла крыніца, набліжаная да Крамля.
Па словах гэтай крыніцы, расійскі бок прасоўвае так званую формулу Анкорыджа, якую ў Маскве лічаць узгодненай паміж прэзідэнтам ЗША Дональдам Трампам і прэзідэнтам Расіі Уладзімірам Пуціным падчас саміту ў жніўні мінулага года.
Паводле гэтай схемы, Расія павінна атрымаць увесь Данбас, а на іншых участках усходу і поўдня Украіны прапануецца замарозіць наяўныя лініі фронту. Украінскі бок раней неаднаразова заяўляў, што такія ўмовы з’яўляюцца для яго непрымальнымі.
Прэзідэнт Украіны Уладзімір Зяленскі паведаміў, што напярэдадні трохбаковай сустрэчы ў ААЭ правёў кансультацыі з украінскай дэлегацыяй і падкрэсліў, што каманда разумее, як дзейнічаць. Паводле яго слоў, падчас размовы абмяркоўваліся рамкі перамоў і чаканы вынік. Ён таксама адзначыў, што фармат дыялогу можа змяняцца ў працэсе сустрэчы, а рашэнні будуць прымацца непасрэдна па ходзе перамоў, паколькі такі фармат выкарыстоўваецца ўпершыню за доўгі час.
Раней Зяленскі заяўляў, што ключавой тэмай перамоваў Украіны, ЗША і Расіі ў Абу-Дабі стане тэрытарыяльнае пытанне, перадусім лёс Данбаса. У Крамлі гэта пацвердзілі. Прэс-сакратар прэзідэнта Расіі Дзмітрый Пяскоў заявіў, што пазіцыя Масквы заключаецца ў тым, каб Узброеныя сілы Украіны пакінулі тэрыторыю Данбаса. Памочнік Пуціна Юрый Ушакоў, у сваю чаргу, адзначаў, што без дыпламатычнага вырашэння тэрытарыяльнага пытання Расія гатовая дамагацца пастаўленых мэтаў ваенным шляхам.
На трохбаковай сустрэчы ў Абу-Дабі сёння будзе абмяркоўвацца пытанне тэрыторый
Перамовы Пуціна з Уіткафам і Кушнерам завяршыліся
Трамп запрасіў у Раду па Газе 50 краін, у тым ліку Расію, Украіну, Кітай, Польшчу і Беларусь
Зяленскі: Данбас — ключавое пытанне перамоваў у Абу-Дабі
Трамп заявіў, што Зяленскі гатовы заключыць мірную дамову
На пратэстанцкі фестываль у «Чыжоўку-Арэну» едзе амерыканскі прапаведнік Франклін Грэм. Разам з ім чакаюць Коўла з жонкай14
Каментары
А хтосці чакаў нешта іншае?