Каля дома №19 на вул. 50 год Кастрычніка ўжо каля трох тыдняў «радуе вока» гарачая крыніца. Жыхарка Смалявічаў абураецца: «Ніякіх работ не праводзіцца, проста праліў гарачай вады. Хто за гэта будзе плаціць і чаму не прымаюцца ніякія меры?»
У Смалявіцкім ЖКГ «Смалявіцкаму краю» патлумачылі, што на гэтым участку цепласеткі адбылася сур’ёзная аварыя: расколіна на трубаправодзе з гарачай вадой, якая выкарыстоўваецца для ацяплення.
Нягледзячы на раскопку і ўстаноўку рамонтнага хамута цалкам спыніць уцечку не ўдалося. Хамут прапускае ваду, што патрабуе больш капітальнага рамонту.
Ключавой прычынай пераносу работ сталі нізкія тэмпературы. Зараз камунальнікі выкарыстоўваюць часовы хамут, які дазваляе сістэме працаваць, хоць і з дэфектам.
«Каб не адключаць людзей ад ацяплення і гарачай вады, мы цяпер рамонт не праводзім», — адзначылі ў ЖКГ.
Логіка дзеянняў службаў наступная: для ліквідацыі расколіны неабходна цалкам адключыць і зліць участак цеплатрасы. Рабіць гэта ў маразы вельмі рызыкоўна — пяць дамоў і школа могуць хутка астыць, што прывядзе да магчымых надзвычайных сітуацый (размарожванне ўнутраных сістэм, рэзкае паніжэнне тэмпературы ў памяшканнях).
Таму прынята рашэнне дачакацца пацяплення — тады адключэнне цяпла будзе менш небяспечным для жыхароў, і рамонт можна будзе правесці з мінімальнымі наступствамі.
Каментары