«У сярэднім кіроўца аўтавоза атрымлівае 130 еўра за суткі». Дальнабойшчык з Віцебска апісаў сваю працу
Віцябчук Алег водзіць вялікагрузныя машыны. Зараз ён працуе на аўтавозе ў Еўропе, а яшчэ вядзе блог у Instagram, дзе паказвае свае працоўныя будні, побыт і адпачынак. Пра працу ён расказаў av.by.
Алег згадвае, што нягледзячы на вялікі вопыт працы на вялікагрузах, на аўтавозе спачатку даводзілася змагацца са страхам.
«Не абышлося і без «факапаў» у першы час. Неяк пашкодзіў бампер аўто падчас пагрузкі. Наколькі памятаю, 600 еўра з уласнай кішэні тады заплаціў.
Спачатку ўзнікалі таксама вялікія цяжкасці з паркоўкай. Стандартная даўжыня складзенага аўтавоза складае 18,75 метра, а з раскладзеным хвастом даходзіць да 21 метра. Бываюць таксама аўтавозы даўжынёй 22 метры, але гэта ўжо негабарыты, таму ездзяць яны са спецыяльнымі значкамі. Для параўнання: даўжыня звычайнай еўрафуры з прычэпам — 16 метраў. Нямецкія «ёлкі» (паркінгі) прызначаныя ў асноўным для стандартных фур, і з вялікім прычэпам можна не змясціцца на парковачным месцы, а калі заехаў, то потым праблема выехаць, пакуль суседзі з паркоўкі не з’едуць…»
Мужчына адзначае, што цягачы на аўтавозах звычайна нізкія, бо зверху на казырок яшчэ ставіцца машына. «Адпаведна, працяглае знаходжанне ў кабіне не такое камфортнае. А нагрузка ў кіроўцы аўтавоза большая. Напрыклад, калі на «тэнце» загрузка займае гадзіну, а максімум паўтары, то расстаўляць аўтамабілі на ўстаноўцы часам і тры гадзіны даводзіцца.
Плюс да ўсяго тут вельмі высокая адказнасць. Трэба максімальна ўважліва прымаць груз, старанна яго аглядаючы. Для падстрахоўкі я заўсёды раблю дэталёвыя фота аўтамабіляў перад загрузкай».
Зарабляюць кіроўцы аўтавозаў, як правіла, больш, чым усе астатнія дальнабойшчыкі.
«Раней мы атрымлівалі ў два разы больш за іншых! Аднак апошнім часам (не ведаю, з чым гэта звязана) на «тэнтах» і «халадзільніках» зарплату падымаюць, а ў нас яна стаіць на месцы.
Я аформлены ў літоўскай фірме. Тут кіроўцы аўтавозаў атрымліваюць у сярэднім 130 еўра за суткі. На стандартных фурах людзям плацяць зараз 95—100 еўра. Розніца ва ўзроўні заработнай платы па-ранейшаму ёсць, але яна ўжо не такая істотная…»
Алег расказвае, на якіх цягачах ездзіў.
«Я ўжо, напэўна, на ўсіх, акрамя Renault, паездзіў. Маю на ўвазе еўрапейскія брэнды. Кітайскіх цягачоў у ЕС не сустрэнеш, «амерыканцы» таксама рэдкія госці на тутэйшых дарогах. Я ездзіў на Volvo, MAN, DAF, Mercedes, а зараз працую на Scania. Гэты цягач лічыцца найбольш зручным для аўтавоза. Але мне з вялікіх машын усё ж такі больш падабаецца Mercedes: ён камфортны, мяккі, усё ў ім прадумана да дробязяў».
Мужчына ездзіў у асноўным па Заходняй, Паўднёвай і Цэнтральнай Еўропе: Францыя, Германія, Бельгія, Іспанія, Італія, Чэхія, Славакія…
Адзначае, што ў Польшчы кантрольныя органы любяць правяраць дальнабойшчыкаў. «У асноўным кантралююць захаванне рэжыму працы і адпачынку, але часам правяраюць таксама даўжыню і вышыню аўтацягніка, мацаванні аўтавоза, тармазы… У выпадку выяўлення парушэнняў выпісваюць штрафы. Сума іх — ад ста еўра ў залежнасці ад парушэння».
Графік Алега такі: восем тыдняў працуе, чатыры — дома. Але графік плаваючы, па жаданні яго можна мяняць.
«Планую ў недалёкай будучыні мяняць працу. Як бы там ні было, а мінусаў у маёй прафесіі куды больш, чым плюсаў. Але галоўнай прычынай сысці з’яўляецца тое, што мне хочацца быць дома з сям’ёй. Вельмі люблю сваю жонку і хачу быць заўсёды побач з ёй. Так што буду шукаць варыянты, як гэта зрабіць!»
Каментары