«За прыгнёт беларускага народа і за тое, што ён крадзе будучыню ў беларусаў». МЗС Украіны заклікала партнёраў узмацніць ціск на Лукашэнку
Міністр замежных спраў Украіны Андрэй Сібіга звярнуўся да міжнародных партнёраў аб узмацненні ціску, каб рэжым Аляксандра Лукашэнкі адчуў адэкватны адказ за злачынствы супраць украінскага і беларускага народаў. Пра гэта гаворыцца ў заяве МЗС.
Як растлумачыў Сібіга, сённяшнія санкцыі супраць Лукашэнкі і яго рэжыму з’яўляюцца адпаведнай, неабходнай і адэкватнай рэакцыяй на гібрыдныя пагрозы і пагрозы бяспецы, якія ён уяўляе для Украіны і астатняй Еўропы.
Міністр нагадаў, што рэжым у Мінску з’яўляецца саўдзельнікам злачынства агрэсіі Расіі супраць Украіны, бо Лукашэнка «прадаставіў беларускую тэрыторыю для нападу і працягвае дапамагаць Маскве ў яе генацыднай вайне супраць Украіны — рэсурсамі, кампанентамі, матэрыяламі, абыходам санкцый і нават сістэмай рэтрансляцыйных станцый для кіравання ўдарнымі дронамі».
«Мы заклікаем партнёраў рушыць за нашым прыкладам і забяспечыць, каб Лукашэнка адчуў адэкватны ціск за свае злачынствы разам з Пуціным, за яго прыгнёт беларускага народа і за тое, што ён крадзе магчымасці і будучыню ў пакаленняў беларусаў», — падкрэсліў Сібіга.
Паводле слоў кіраўніка МЗС, ва Украіне вераць у еўрапейскую будучыню беларускага народа пасля таго, як ён вызваліцца ад прыгнёту Лукашэнкі.
«У будучыні мы будзем гатовыя прыняць дэмакратычную Беларусь у фармаце Люблінскага трохвугольніка разам з Польшчай і Літвой. Беларусь належыць Еўропе, а не «рускаму свету»», — дадаў Сібіга.
18 лютага прэзідэнт Украіны Уладзімір Зеленскі заявіў аб прымяненні санкцый супраць беларускага Лукашэнкі.
Цяпер чытаюць
Арына Сабаленка выйшла да мінчукоў у атачэнні васьмі ахоўнікаў ВІДЭА17
Каментары