На карыбскім востраве выпрабоўваюць інавацыйную сістэму хвалевай энергетыкі і апраснення вады
У астраўной карыбскай дзяржаве Барбадас стартуе пілотны праект па выкарыстанні энергіі акіянічных хваль. Дацкая кампанія Wavepiston плануе запусціць камерцыйную ўстаноўку магутнасцю 50 мегават, якая будзе выпрацоўваць не толькі электраэнергію, але і прэсную ваду, паведамляе выданне New Atlas.
Пагадненне аб супрацоўніцтве падпісана паміж урадам Барбадаса (праз агенцтва Export Barbados) і дацкай фірмай пасля некалькіх месяцаў папярэдніх даследаванняў. Праект стане важным крокам ад тэарэтычных разлікаў да рэальнага ўкаранення тэхналогіі ў Карыбскім рэгіёне.
Асновай распрацоўкі з’яўляецца доўгая гнуткая канструкцыя — так званая «нітка» даўжынёй каля 350 метраў, замацаваная ў моры. Уздоўж яе размешчаныя модулі — зборшчыкі энергіі. Кожны з іх абсталяваны невялікім падводным «ветразем», які рухаецца пад уздзеяннем хваль.
Гэты рух прыводзіць у дзеянне гідраўлічную помпу, што нагнятае марскую ваду пад высокім ціскам. Далей вада па трубаправодзе паступае на цэнтральную станцыю, дзе альбо круціць гідратурбіну і выпрацоўвае электрычнасць, альбо накіроўваецца ў сістэму для апраснення і атрымання пітной вады.
Дзякуючы таму, што модулі рухаюцца не адначасова, паток вады пад ціскам атрымліваецца стабільным. Акрамя таго, канструкцыя часткова кампенсуе нагрузкі ад хваль, што робіць яе больш устойлівай і менш дарагой у абслугоўванні.
Энергія хваль лічыцца адной з самых стабільных аднаўляльных крыніц — у адрозненне ад сонца і ветру, яна менш залежыць ад змен надвор’я. Пры гэтым тэхналогія павінна адпавядаць строгім экалагічным патрабаванням.
Па выніках папярэдніх выпрабаванняў, негатыўнага ўплыву на марскія экасістэмы не выяўлена — у некаторых месцах нават адзначана павелічэнне колькасці марскіх арганізмаў каля ўстановак.
Для Барбадаса праект мае стратэгічнае значэнне. Краіна імкнецца дасягнуць кліматычнай нейтральнасці да 2030 года і ўжо інвестуе ў сонечную, ветравую энергетыку і сістэмы назапашвання энергіі. Новая хвалевая станцыя павінна ўмацаваць энергетычную незалежнасць краіны, забяспечыць ёй дадатковыя запасы пітной вады, стварыць новыя працоўныя месцы і зрабіць Барбадас рэгіянальным цэнтрам хвалевай энергетыкі.
Каб забяспечыць свае дата-цэнтры, амерыканскія тэхнагіганты будуюць «ценявую энергасістэму»
Што такога адбываецца ў эканоміцы, што Лукашэнка то ашчаджае на электрычнасці, то хоча скараціць чыноўнікаў?
Rheinmetall прапануе падрыхтаваць сотні модульных заводаў па вырабе паліва з вадароду. Яны ўратуюць у выпадку жорсткай вайны з Расіяй
Беларус паляцеў у Ніцу праз Стамбул — цяпер ён у коме ў французскай бальніцы. Мясцовыя медыкі раяць адключаць яго6
Каментары