У Польшчы арыштавалі групу тэлефонных махляроў. Сярод іх былі і беларусы
Арыштавана 13 чалавек.
Польскія праваахоўнікі арыштавалі 13 чалавек, якія займаліся тэлефонным махлярствам і адмываннем грошай. Сярод іх грамадзяне Польшчы, Украіны і Беларусі, піша Most.
Як паведамляе Ніжнесілезская мытна-падатковая служба, група, у якую ўваходзілі затрыманыя, стварыла фэйкавы кол-цэнтр і выманьвала грошы, карыстаючыся распаўсюджанай схемай. Члены групы тэлефанавалі розным людзям, прадстаўляліся супрацоўнікамі банкаў і казалі кліентам пра пагрозу ўзлому іх рахункаў. Махляры прапаноўвалі неадкладна перавесці грошы нібыта на тэхнічны рахунак, каб іх засцерагчы. Насамрэч рахункі кантралявалі самі зламыснікі.
Для легалізацыі атрыманых грошай абвінавачаныя выкарыстоўвалі рахункі, зарэгістраваныя на падстаўных асоб, а таксама на фірмы, якія пад выглядам гаспадарчай дзейнасці займаліся адмываннем грошай. Далей грошы пераводзілі на замежныя рахункі альбо мянялі на крыптавалюту. Група карысталася сеткай крыптаабменнікаў.
Аператыўнікі канфіскавалі 2,6 млн злотых (615 тысяч еўра), атрыманых падчас злачыннай дзейнасці.
Падазраваныя знаходзіліся ў розных рэгіёнах Польшчы. Затрыманні прайшлі ў Ніжнесілезскім, Вялікапольскім, Мазавецкім, Малапольскім, Сілезскім і Паморскім ваяводствах. Праваахоўнікі не выключаюць, што будуць арыштаваныя і іншыя фігуранты справы.
Дзесяць абвінавачаных змясцілі пад арышт. За ўдзел у арганізаванай злачыннай групе і шматлікія факты махлярства і вымагальніцтва грошай ім пагражае да 15 гадоў пазбаўлення волі.
Цяпер чытаюць
Хітры расіянін Яўген з жонкай і малым прыдумалі, як бясплатна пажыць у кватэры беларускі23
Каментары