У Мінску расказалі, якой будзе былая Валадарка пасля рэканструкцыі ФОТЫ
У Мінску распачалі маштабную рэканструкцыю Пішчалаўскага замка на вуліцы Валадарскага — былога СІЗА № 1 (у народзе «Валадарка»). Праект прымеркаваны да 200‑годдзя будынка, якое адзначылі ў 2025 годзе. Галоўная мэта — уключыць тэрыторыю замка ў агульную гарадскую прастору і зрабіць яе часткай турыстычнага маршруту па цэнтры сталіцы, расказаў агенцтву «Мінск-Навіны» навуковы кіраўнік праекта Аляксандр Вашкевіч.
Гістарычны комплекс уключае сам замак, уваходную групу, аднапавярховыя і двухпавярховыя будынкі, а таксама гаспадарчыя пабудовы. Раней увесь участак быў абнесены мурамі, але яны не захаваліся, як і адна з вежаў, што абвалілася ў 2008 годзе.
Пасля рэканструкцыі тут мае з’явіцца шматфункцыянальны комплекс. Захаваюць чатыры гістарычна каштоўныя будынкі: сам замак, уваходную групу, аднапавярховы дом і былую стайню. Пазнейшыя пабудовы і стары плот, якія не маюць гістарычнай вартасці, знеслі. Гэта дазволіць зрабіць прастору больш адкрытай. На тэрыторыі плануюць стварыць пляцоўку для масавых мерапрыемстваў з мабільнай сцэнай, зону для прагулак і паркоўку.
Праект прадугледжвае аднаўленне абрынутай сцяны і адной з вежаў. Будуць адноўленыя гістарычныя памеры і выгляд аконных і дзвярных праёмаў, бо частку з іх змянілі ў розныя перыяды. Унутры захаваюць старадаўнія скляпенні і адрэстаўруюць цэнтральную металічную лесвіцу, а таксама вінтавую лесвіцу ў вежы. Плануецца часткова змяніць унутраную планіроўку, прыбраўшы савецкія перагародкі, каб вярнуць будынку яго першапачатковую прастору.
На цокальным і першым паверхах размесцяцца ўстановы грамадскага харчавання. У былой стайні таксама адкрыецца яшчэ адзін аб’ект харчавання, а ў двухпавярховым будынку паблізу плануюць размясціць адміністрацыйныя памяшканні і, магчыма, клуб гістарычнай рэканструкцыі.
Падрадчыкі ўжо правялі супрацьаварыйныя работы, умацавалі канструкцыі і завяршылі дэмантаж пазнейшых пабудоў. Цяпер ідзе разбор старых інжынерных сетак. Праектаванне двух з чатырох будынкаў амаль завершана, а поўны пакет дакументацыі плануюць падрыхтаваць у першай палове 2026 года. Пасля гэтага пачнуцца асноўныя будаўнічыя работы.
З'явіліся антуражныя ФОТЫ, як выглядае былая Валадарка не толькі звонку, але і знутры
Так цяпер выглядае былая Валадарка, пастаўленая на рэканструкцыю ФОТАФАКТ
У Мінску зносяць будынкі каля Валадаркі
Да асноўнага этапу рэканструкцыі былой Валадаркі прыступяць у наступным годзе, пачаўся дэмантаж некаторых элементаў
«Чаму мы павінны неяк ушчэмліваць сябе?». Дырэктарка РТБД патлумачыла, чаму паставіла спектакль паводле Пушкіна ў адным з апошніх тэатраў краіны, які працаваў па-беларуску5757
Каментары