Марк Рутэ: Еўропа падтрымлівае ўдары па Іране, але ўдзельнічаць у іх не будзе
Генеральны сакратар НАТА Марк Рутэ заявіў, што Еўропа лічыць Іран пагрозай для рэгіёна і падтрымлівае дзеянні ЗША і Ізраіля, аднак не плануе ўдзельнічаць у пачатай імі вайсковай аперацыі. Паводле яго слоў, гэта кампанія, якую вядуць выключна амерыканскія і ізраільскія сілы, а войскі НАТА не будуць задзейнічаныя, паведамляе Бі-бі-сі.
Кіраўнік альянсу адзначыў, што іранскія ўдары закранаюць не толькі краіны Персідскага заліва. Паводле паведамленняў, беспілотнікі Ірана дасягнулі нават брытанскай авіябазы на Кіпры, дзе былі збітыя. Пасля гэтага шэраг дзяржаў рэгіёна прынялі дадатковыя меры бяспекі, у тым ліку ўзмацнілі вайсковую прысутнасць.
Разам з тым еўрапейскія краіны стараюцца не ўцягвацца непасрэдна ў канфлікт. ЗША звярталіся да саюзнікаў з просьбай даць доступ да вайсковых баз і лагістычнай інфраструктуры. Генеральны сакратар НАТА растлумачыў, што гаворка ідзе найперш пра транспартнае забеспячэнне, доступ да аэрадромаў і дапаможныя аперацыі, а не пра ўдзел у баявых ударах.
Некаторыя краіны адмовіліся дазволіць выкарыстоўваць сваю тэрыторыю для правядзення аперацыі. Так, Іспанія матывавала гэта адсутнасцю міжнароднага мандата.
Вялікабрытанія спачатку таксама не спяшалася даваць дазвол, што выклікала незадаволенасць з боку кіраўніцтва ЗША. Амерыканскі бок адкрыта крытыкаваў саюзнікаў за ваганні і нежаданне актыўна падтрымаць аперацыю.
Брытанскія ўлады ўрэшце заявілі, што будуць кіравацца нацыянальнымі інтарэсамі і не стануць удзельнічаць у наступальных дзеяннях, спасылаючыся на досвед мінулых канфліктаў. Аднак яны дапускаюць падтрымку ў абарончых мэтах. Паводле звестак СМІ, для гэтага могуць выкарыстоўвацца асобныя вайсковыя аб’екты.
Германія, у сваю чаргу, абмежавала сваю ролю аховай уласных вайскоўцаў, якія знаходзяцца на міжнародных базах у рэгіёне. Афіцыйныя асобы падкрэсліваюць, што іх задача — гарантаванне бяспекі сваіх грамадзян і кантынгентаў.
Генеральны сакратар НАТА не стаў адказваць на пытанне, ці быў ён загадзя праінфармаваны пра пачатак удараў, але адзначыў, што паміж Вашынгтонам і альянсам падтрымліваецца шчыльнае супрацоўніцтва і пастаянныя кантакты.
Міністр абароны ЗША запэўніў, што ў «бясконцую вайну» аперацыя супраць Ірана не ператворыцца
Трамп расказаў, што для яго стала найбольшай неспадзяванкай пасля ўдараў па Іране
Лукашэнка знайшоў незвычайныя словы для спачування Хаменеі: «вераломная атака»
Удары Ізраіля і ЗША па Іране прывялі да закрыцця важных нафтагазавых аб’ектаў на Блізкім Усходзе
Цяпер чытаюць
Сяргей узяў грошы за кантракт і пайшоў здавацца ў палон пры першай магчымасці. Пакручасты лёс беларуса, які падпісаўся ваяваць за Расію7
Каментары