«Выжыла толькі котка». Абгарэлая, яна прасядзела 12 гадзін на лесвіцы пасля пажару ў кватэры ў Маладзечне, дзе загінулі тры чалавекі
Кажуць, што летась гэтую котку загінулая ў агні гаспадыня выкінула з 7‑га паверха. На пажары адтуль скокнуў сын жанчыны і разбіўся.
Увечары 2 сакавіка ў адным са шматпавярховікаў у Маладзечне адбыўся страшны пажар. Згарэла гаспадыня кватэры і яе знаёмы, а 31‑гадовы сын гаспадыні разбіўся, выскачыўшы з акна сёмага паверха.
Нейкім цудам у пажары выжыла котка. Яна моцна пацярпела, піша mogilev.in.
Валанцёры арганізацыі «Шанс на жыццё. Маладзечна» знайшлі жывёлу на лесвіцы ў пад'ездзе — пасля пажару ім напісалі ў чаце, перадаўшы словы ратавальніка пра котку, якая адна засталася жывой.
У жывёлы абгарэлая мордачка і лапы. Котку адразу ж адвезлі да ветэрынараў, дзе ёй аказалі першую дапамогу.
На выходных, як распавялі валанцёры, жывёлу адвязуць у Мінск у ветклініку «Кампаньён» на кансультацыю да афтальмолага.
На заклік аб дапамозе ў сацсетках адгукнулася шмат людзей: пераводзяць грошы на лячэнне, прывозяць ежу, некаторыя гатовыя забраць яе сабе.
Пакуль што котка мае патрэбу ў лячэнні, а пасля валанцёры паспрабуюць знайсці сваякоў загінулых гаспадароў — магчыма, яны захочуць забраць яе, бо «так будзе правільна».
У каментарах пішуць, што нібыта ў мінулым годзе гэтую самую котку загінулая жанчына выкінула з 7‑га паверха. Тады жывёла выжыла, а відавочцы звярталіся ў міліцыю.
Паводле папярэдняй версіі Следчага камітэта, напярэдадні пажару ў кватэры пілі і курылі. Потым здарылася бяда, ад якой пацярпеў амаль увесь пад'езд: кватэры зверху закапціліся, знізу — залітыя вадой. Людзі ў стрэсе.
А абгарэлая котка прасядзела на лесвіцы, пакуль яе не забралі валанцёры — паводле іх слоў, гэта адбылося праз 12 гадзін пасля пажару. Увесь гэты час на яе ніхто не звяртаў увагі.
Цяпер чытаюць
Ананімы — гісторыі беларусаў, якім прыходзіцца шыфравацца, бо рэжым лічыць іх дзейнасць «крыміналам»10
Каментары