Хакейны клуб «Дынама-Мінск» правёў «жаночы матч» з падарункамі — і давеў заўзятарак да шаленства
Падарункі, якія абяцалі ўсім заўзятаркам у ружовым, скончыліся за 20 хвілін. А лімітаваныя ружовыя худзі выкупіла кампанія-партнёр для сваіх супрацоўніц — рэальныя фанаткі іх не атрымалі.
Хакейны клуб «Дынама-Мінск» вырашыў зрабіць сюрпрыз для заўзятарак да Міжнароднага жаночага дня. У тэлеграм-канале клуба паведамілі, што кожная, хто прыйдзе на матч 5 сакавіка ў ружовым, атрымае падарунак ад «Дынама-Мінск» і іх партнёра — беларускага касметычнага брэнду Relouis.
Але ж падарункаў хапіла не ўсім. Людзі скардзяцца, што правялі ў чарзе шмат часу і не атрымалі нічога.
«Сказаць, што арганізатары разам са спонсарам прабілі дно — нічога не сказаць. «Дынама-Мінск», у вас там усё ў парадку? Не пазнаю вас зусім! Прыехаць да 18:20 з дзяўчынкай-падлеткам у ружовым, якая ненавідзіць гэты колер, угаварыць яе прапусціць трэніроўку, адстаяць чаргу ў 10000 чалавек — каб што? Каб цябе развярнулі са словамі «падарункі скончыліся», і гэта ў наш жаночы дзень», — абураюцца.
«Што мы думаем з гэтай нагоды? Абурэнне наконт правядзення гэтага мерапрыемства! У 18:30 падарункаў няма! Крыўдна не таму, што памада не дасталася, а за маленькіх дзяўчынак, за іх слёзы — яны апрануліся ў ружовае, а ім крычаць: «падарункаў НЯМА!!!». Ганьба спонсару Relouis і арганізатарам «Дынама». Калі вы праводзіце такое мерапрыемства і абяцаеце падарунак кожнай, хто прыйдзе ў ружовым, то будзьце ласкавы — выконвайце гэта!»
«Дзякуй за падарункі, Relouis. Пакуль дзяўчаты ў ружовым стаялі ў чарзе, падарункі атрымлівалі хлопцы ў чорным! Абурэнню няма межаў у тых сотняў людзей, якія стаялі ў чарзе!».
У каментарах у інстаграме хакейнага клуба ўсплыла нават мемная фраза «У панядзелак дойдзе да Лукашэнкі!».
Быў і яшчэ адзін непрыемны святочны сюрпрыз. Перад матчам таксама рэкламавалася, што ў фан-краме клуба будзе прадавацца лімітаваная серыя — ружовыя худзі і шапкі з лагатыпамі «Дынама».
Ахвотных набыць іх было вельмі шмат. Але, сцвярджаюць у сацсетках, ружовых худзі аказалася ўсяго некалькі дзясяткаў і хапіла іх толькі для спонсараў — супрацоўніц Relouis.
Заўважылі людзі і тое, што ўсе жанчыны, каму пашчасціла атрымаць тыя худзі разладу, сядзелі на трыбуне разам.
Дзіўнае супадзенне? Не. Ларыса Грыневіч, дырэктарка кампаніі «Рэлуі бел» апублікавала ў Threads фотаздымкі, на якіх яна разам з супрацоўніцамі кампаніі пазіруе на трыбуне і ў калідоры ў тых самых ружовых святочных худзі.
На каментары пра расчараваных людзей, якія не дачакаліся абяцаных усім жанчынам у ружовым падарункаў, дырэктарка адказвае: «Падарункі яшчэ падвозілі, такі ажыятаж быў. Але, як вы разумееце, нічога бясконцага не бывае. Каманда маркетолагаў «Дынама» вельмі выратоўвала кветкамі для заўзятарак».
У сацсетках незадаволены, што праз Relouis худзі не змаглі атрымаць рэальныя заўзятаркі хакейнага клубу:
«Вельмі раззлавала тое, што худзі, за якімі ганяешся ўвесь сезон, маніторыш фан-шоп перад кожным хатнім матчам, ляціш туды адразу пасля паведамлення пра іх паступленне да 8 сакавіка — а там усё, нечакана скончыліся. «Дынама», як так? Прыходзіш на ружовы матч і бачыш батальён Relouis у гэтых самых худзі! На каго вы арыентуецеся? Яны з вамі разава, а мы з вамі гадамі!
Крыўдна! І крыўдна, што за свае ўчынкі не ўмееце адказваць. Гэта мужчынскі клуб з пазіцыі сілы выдаляе жаночыя каментары».
Не пашанцавала нават тым, хто аплаціў мерч загадзя: «У мяне жонка раніцай замовіла, аплаціла, аформіла самавываз. Прыехала — і нічога няма. Грошы пакуль не вярнулі, сказалі, што, магчыма, у панядзелак разбяруцца».
Тым часам, на «Куфары» ўжо пачалі перапрадаваць ружовыя худзі «Дынама-Мінск». За адно худзі просяць 150 рублёў, за камплект (худзі, майка, 2 шапкі) — 400.
Цяпер чытаюць
Міліцыя затрымала таго самага расійскага турыста, які кінуў недакурак на вуліцы. Заўтра суд33
Каментары