Цэны на нафту ўпершыню з 2022 года падняліся вышэй за 115 даляраў за бараль
Скачок адбыўся адразу на 20 працэнтаў, а некаторыя аналітыкі мяркуць, што цэны могуць дасягнуць у сакавіку і 150 даляраў.
Сусветныя цэны на нафту ўпершыню з 2022 года перавысілі 115 даляраў за бараль на фоне засцярог, што абвастрэнне вайны ЗША і Ізраіля з Іранам можа надоўга парушыць пастаўкі праз Армузскі праліў, піша Бі-бі-сі.
Раніцай у панядзелак у Азіі нафта маркі Brent падаражэла прыкладна на 20% — да 115 даляраў за бараль, а амерыканская нафта Nymex Light Sweet вырасла больш чым на 17% — да 106,77 даляра.
Ф’ючарсы на Brent з пастаўкай у маі на лонданскай біржы Intercontinental Exchange выраслі на 25% — да 116 даляраў за барэль. Пра гэта сведчаць даныя таргоў па стане на 07:35.
Многія ўдзельнікі рынку прагназавалі, што на гэтым тыдні цана нафты дасягне адзнакі 100 даляраў за бараль.
У выніку для скачка на 10% спатрэбілася прыкладна хвіліна, а яшчэ праз 15 хвілін цана вырасла яшчэ на 10% падчас ранніх таргоў у Азіі.
На мінулым тыдні рынкі захоўвалі адносны спакой, хоць мільёны бараляў нафты і звадкаванага прыроднага газу аказаліся заблакаванымі ў Персідскім заліве з-за праблем з праходам праз Армузскі праліў.
Аднак эскалацыя ў выходныя, а таксама кадры разбурэння энергетычнай інфраструктуры як у Іране, так і ў краінах Персідскага заліва, выклікалі рэзкую трывогу на рынках.
Цяпер галоўнае пытанне — як будзе развівацца сітуацыя далей. Некаторыя аналітыкі лічаць, што калі праліў застанецца закрытым да канца сакавіка, цэны на нафту могуць усталяваць рэкорд і перавысіць 150 даляраў за бараль.
Рост, верагодна, прывядзе да далейшага падаражання бензіну, а таксама важных вытворных прадуктаў, такіх як авіяцыйнае паліва і ключавыя кампаненты для вытворчасці ўгнаенняў.
Галоўнымі спажыўцамі нафты і газу з краін Персідскага заліва застаюцца азіяцкія рынкі.
Аднак ужо ёсць прыкметы таго, што азіяцкія пакупнікі павышаюць цэны на амерыканскі газ: некаторыя танкеры, якія першапачаткова накіроўваліся ў Еўропу, разварочваюцца проста пасярэдзіне Атлантыкі.
Прэзідэнт ЗША Дональд Трамп, каментуючы скачок цэн, заявіў, што кароткатэрміновы рост — «невялікая плата» за ліквідацыю іранскай ядзернай пагрозы.
«Кароткатэрміновы рост цэн на нафту, які хутка знікне пасля ліквідацыі іранскай ядзернай пагрозы, — гэта вельмі невялікая плата за бяспеку і мір для ЗША і ўсяго свету», — напісаў ён у сацсетцы Truth Social.
«ТОЛЬКІ ДУРНІ ДУМАЮЦЬ ІНАКШ!» — дадаў ён.
Міністр энергетыкі ЗША ў нядзелю заявіў амерыканскім тэлеканалам, што ўдары па энергетычнай інфраструктуры Ірана наносіць Ізраіль, а не ЗША — на фоне занепакоенасці ростам унутраных цэн на бензін, выкліканым вайной.
Цяпер чытаюць
«У сына на тэлефоне былі налепленыя сцяг і герб Расіі. З гэтага ўсё пачалося». Бацька школьніка з Баранавіч расказаў, як яго сына цкавалі аднакласнікі18
Каментары