Нафта даражэе, але расійскі рубель і ўслед за ім беларускі — таннеюць. Вось чаму так адбываецца
Апошні тыдзень расійскі рубель прыкметна таннее адносна еўра і даляра. Аналагічныя тэндэнцыі назіраюцца і з рублём беларускім.
Абодва рублі пайшлі ўніз
Яшчэ тыдзень таму — у чацвер, 12 сакавіка, даляр па Нацбанку каштаваў 2,92 рубля, еўра — 3,392. Па выніках таргоў у гэты чацвер даляр каштуе ўжо 3,02 рубля, а еўра — 3,46.
У абменніках даляр можна здаць ужо па 3,02, а набыць за 3,03 — 3,05.
Расійскі рубель за тыдзень патаннеў адносна даляра з 79,50 да 85 рублёў. Адносна еўра — з 91,59 да 98 рублёў.
Эксперт BEROC Анастасія Лузгіна называе асноўную прычыну, чаму на фоне даражэе нафты таннее расійскі рубель, а разам з ім і беларускі.
«У сакавіку Міністэрства фінансаў Расіі прыпыніла продаж валюты ў рамках бюджэтнага правіла да моманту абнаўлення правілаў», — тлумачыць эканаміст.
У выніку на ўнутрырасійскім рынку валюты стала менш, што і прывяло да змены курсу.
Танны рубель пры дарагой нафце
«Што датычыцца цэн на нафту, то яны сапраўды значна выраслі, але эфект ад гэтага росту ў Расіі адчуюць не адразу, а бліжэй да красавіка-мая, паколькі яшчэ няма паступленняў ад кантрактаў па новых, больш высокіх цэнах.
Калі надыдзе перыяд паступленняў плацяжоў ужо па новых кантрактах, то гэта пазітыўна паўплывае на расійскі валютны рынак», — адзначае Лузгіна.
Таксама эксперт адзначае, што ў будучыні на расійскім валютным рынку пазітыўна адаб'ецца месячнае зняцце абмежаванняў з расійскай нафты з боку ЗША, але пакуль рынак працуе ва ўмовах абмежаваных паступленняў.
Яшчэ адным важным момантам, які ўплывае на курс даляра, Анастасія Лузгіна называе рашэнне Федэральнай рэзервнай службы ЗША пакінуць ключавую стаўку на ранейшым узроўні.
«Калі б яна знізілася, то гэта магло б прывесці да некаторага зніжэння курсу даляра, але гэтага, як і прагназавалі эксперты, не адбылося. Даляр у найбліжэйшай перспектыве застанецца моцным. Гэта хоць і ўскосна, але таксама аказвала ўплыў на курс расійскага рубля», — адзначае эканаміст.
Унутрырасійскі фактар
Трэцім фактарам, які можа ўплываць на расійскі рубель, эксперт называе прызначанае на 20 сакавіка пасяджэнне Цэнтрабанка Расіі паводле ключавой стаўкі.
«Ад прынятай пастановы таксама будзе залежаць дынаміка расійскага рубля. Калі стаўка панізіцца, то для курсу гэта будзе яшчэ адной прычынай для зніжэння. Калі застанецца на ранейшым узроўні, то курс можа заставацца больш стабільным, але многія расійскія эксперты чакаюць хоць і невялікае, але ўсё ж зніжэнне ключавой стаўкі», — кажа Лузгіна.
На думку эксперта, усе гэтыя фактары маюць кароткатэрміновы характар і будуць з часам мяняцца.
«Аднак, хутчэй за ўсё, у будучыні захаваецца тэндэнцыя на зніжэнне курсу расійскага рубля, але гэта будзе адбывацца больш плаўна, чым цяпер.
Нават з улікам павелічэння паступленняў ад дарагой нафты бюджэтнае правіла будзе працаваць, але толькі ўжо ў зваротным кірунку — Мінфін Расіі будзе выкупляць залішнюю валюту пры высокіх коштах нафты.
Таму моцных фактараў для росту расійскага рубля не назіраецца, бо невялікае зніжэнне курсу да 90‑95 рублёў за даляр адпавядае эканамічным інтарэсам Расіі», — мяркуе эксперт.
А што з рублём беларускім?
Што тычыцца беларускага рубля, то ён традыцыйна працягне паўтараць траекторыю рубля расійскага.
«На беларускі рубель уплывае менавіта знешні фактар. Унутраных фактараў, якія маглі б выклікаць патанненне рубля, не назіраецца. Прынамсі, па пачатку года вынікі знешняга гандлю былі нядрэннымі, насельніцтва па-ранейшаму прадае валюту. Таму змяненне курсаў у Беларусі адбываецца перш за ўсё праз расійскі фактар».
Малодшы сын Сахашчыка абвешчаны зніклым без вестак. Выглядае, ён ваяваў за Расію84
Каментары