Беларускім мужчынам за вялікія грошы прапаноўваюць пратэсціраваць на сабе прэпарат для лячэння раку малочнай залозы
Нацыянальная антыдопінгавая лабараторыя прапануе здаровым мужчынам па 4000 рублёў.
Спасылкі на цікавую прапанову з’явіліся ў Threads.
Нацыянальная антыдопінгавая лабараторыя цяпер праводзіць клінічнае даследаванне біяэквівалентнасці (прэпарат «Пертузумаб»). Калі казаць простай мовай, хочуць праверыць, ці дзейнічае новы прэпарат так, як арыгінальны.
Сам «Пертузумаб» выкарыстоўваюць для лячэння раку малочнай залозы (дарэчы, менавіта гэты від раку найбольш часта сустракаецца ў беларускіх жанчын).
Пазначана, што правядзенне даследавання прэпарата адобрана Міністэрствам аховы здароўя і незалежным этычным камітэтам. У якасці добраахвотнікаў шукаюць здаровых мужчын ва ўзросце ад 18 да 45 гадоў.
Само даследаванне будзе выглядаць так: спачатку чалавек пройдзе поўнае медыцынскае абследаванне, потым яго шпіталізуюць з пятніцы да нядзелі і ўвядуць прэпарат. А пасля неабходна будзе рабіць амбулаторныя візіты па ўзгодненаму графіку.
Ганарар для ўдзельнікаў прадугледжаны — абяцаюць заплаціць кожнаму па 4000 рублёў.
Карыстальнікаў Threads здзівіла тое, што прэпарат ад раку малочнай залозы плануюць тэсціраваць выключна на мужчынах. Але адказ аказаўся банальным: згодна з правіламі правядзення даследаванняў біяэквівалентнасці, пол удзельнікаў не мае значэння, аднак неабходна ўлічваць рызыку для жанчын дзетароднага ўзросту. У гэтым выпадку было вырашана абмежаваць удзел жанчын дзетароднага ўзросту, каб мінімізаваць рызыкі для рэпрадуктыўнай сістэмы.
Тым мужчынам, якія хочуць паўдзельнічаць у даследаванні, неабходна запоўніць невялікую анкету на сайце Нацыянальнай антыдопінгавай лабараторыі. Там сярод стандартных пытанняў пра ўзрост, працу і кантактныя дадзеныя ёсць і пытанні пра спажыванне алкаголю і наркотыкаў, а таксама курэнне.
Неабходна будзе таксама распавесці, ці з’яўляецца мужчына вегетарыянцам і ці прымае рэгулярна нейкія лекі (у тым ліку і БАДы). Папросяць і прызнацца, ці прымаў раней чалавек удзел у нейкіх клінічных даследаваннях і як даўно гэта было.
Каментары