Аляксандр Саладуха прызнаўся ў любові да нятопавага беларускага футбольнага клуба
На выходных па спартыўных сайтах разляцелася фота спевака ў шаліку ФК «Баранавічы» — дэбютанта вышэйшай лігі па футболе. Ён глядзеў матч першага туру чэмпіянату краіны супраць «Іслачы».
Betnews.by звязаліся з заслужаным артыстам і даведаліся, чым жа запаў яму ў душу клуб, што ўпершыню ў сваёй гісторыі выйшаў у вышэйшую лігу.
— Усё вельмі проста: вёска Паланечка Баранавіцкага раёна — радзіма майго бацькі Антона Максімавіча Саладухі. Ён быў вайскоўцам, служыў і ў Расіі, і ў Казахстане. Але кожнае лета ў яго адпачынак мы прыязджалі ў Паланечку. Частку адпачынку праводзілі там, частку — на радзіме мамы ў Капыльскім раёне. (…) Мой дзядзька жыў зусім побач са стадыёнам «Лакаматыў», і я малы ганяў у футбол на гэтым стадыёне. Пасля Казахстана мне гэта было нязвыкла — там жа і тады трава на полі дрэнна расла.
Калі ў канцы мінулага года я даведаўся, што «Баранавічы» ўпершыню выйшлі ў вышэйшую лігу, надта ж усцешыўся. Сам знайшоў кантакт дырэктара клуба Івана Ігаравіча Крутава і выйшаў на сувязь. А паколькі свой першы матч яны гулялі з «Іслаччу», то я прымчаўся ў Мінск на гульню падтрымаць каманду.
Іван мяне сустрэў, мы паразмаўлялі, ён падарыў мне клубны шалік. Мы падышлі да поля і паглядзелі на размінку каманды. А потым я пайшоў глядзець гульню на фан-сектар «Баранавічаў» разам са сваім кіроўцам.
Паўтаруся: гэта для мяне вельмі важна, бо Баранавічы — радзіма майго бацькі. А то ўжо пачынаюць у інтэрнэце пісаць, што ў мінулым годзе я сфатаграфаваўся з шалікам «Тарпеда» Жодзіна, а цяпер — з атрыбутыкай «Баранавічаў».
У канцы мінулага года я сапраўды быў на матчы жодзінскага «Тарпеда» (з «Іслаччу»). Выступаў там. Але тады мяне Betera (насамрэч Fonbet — НН) запрасіла, і я атрымаў свой ганарар. Гэта мая праца.
А за «Баранавічы» я заўзею па закліку сэрца! І 11 красавіка я абавязкова паеду на іх першы хатні матч з чэмпіёнам Беларусі «МЛ» на стадыён «Лакаматыў», які ведаю з дзяцінства!
— Ці разглядаеце варыянт выступлення на хатняй гульні «Баранавічаў»?
— Хачу прапанаваць гэты варыянт дырэктару клуба. А ўвогуле я выступаў на стадыёне «Лакаматыў» з сольнікам 20 мая 2012 года, і там быў аншлаг.
— А ўвогуле цікавіцеся футболам?
— Так, па магчымасці. Ведаю, што наша зборная пад кіраўніцтвам Віктара Ганчарэнкі паляцела на Кіпр на таварыскі матч. Проста доктар, у якога я лячуся, быў запрошаны ляцець са зборнай.
А яшчэ я ў дзяцінстве, калі жыў у Казахстане, заўзеў за мінскае «Дынама», якое трэніраваў Эдуард Малафееў. І вы не ўяўляеце маё захапленне, калі я перавёўся з Караганды ў медыцынскі інстытут у Мінск і ўпершыню трапіў на матч «Дынама».
Гэта было ў 1979 годзе. Падымаюся над купалам стадыёна, а там поўна людзей. Умяшчальнасць стадыёна была 45 тысяч. Гуляюць Пудышаў, Пракапенка, Курненін, Вергеенка ў варотах… Я быў у захапленні! Мне было ўсяго 20 гадоў, і да гэтага я чытаў пра ўсё гэта толькі ў часопісах.
***
Дарэчы, «Баранавічы» прайгралі «Іслачы» з лікам 0:2, гульня прайшла на стадыёне ФК «Мінск». У другім туры клуб 5 красавіка згуляе ў Барысаве з некалькі зорным БАТЭ.
Цяпер чытаюць
Беларусаў па вяртанні дамоў на мяжы ўсё часцей раздзяваюць дагала9
Каментары