Карціны Рэнуара, Сезана і Маціса агульнай вартасцю ў некалькі мільёнаў еўра былі выкрадзены ў выніку рабавання Фонду Маньяні-Рока пад Пармай. Рабаванне прыватнага музея, па словах мясцовай паліцыі, адбылося яшчэ на мінулым тыдні, у ноч на 23 сакавіка, піша Бі-бі-сі.
Сярод выкрадзеных работ — «Рыбы» П'ера Агюста Рэнуара, «Нацюрморт з вішнямі» Поля Сезана і «Адаліска на тэрасе» Анры Маціса.
Рабаўнікоў, як паведамляюць у паліцыі, было чацвёра. Зламыснікі ў масках узламалі ўваходныя дзверы, праніклі ў адну з залаў на першым паверсе і сышлі з шэдэўрамі праз музейны сад.
Уся аперацыя доўжылася менш за тры хвіліны і была, па словах праваахоўнікаў, добра спланавана і арганізавана.
Рабаўнікоў, як пішуць італьянскія СМІ, відавочна, спудзіла сігналізацыя, якая спрацавала: чацвёртую карціну, якую меркавана мелі намер скрасці, яны пакінулі ўнутры.
У цяперашні час паліцыя вывучае запісы камер відэаназірання музея, а таксама суседніх аб'ектаў.
Фонд Маньяні-Рока за 20 кіламетраў ад Пармы захоўвае калекцыю мастацтвазнаўца Луіджы Маньяні, якая ўключае таксама працы Дзюрэра, Рубенса, Ван Дэйка, Гоі і Манэ. Фонд быў заснаваны ў 1977 годзе.
Гэта рабаванне стала чарговым у серыі злачынстваў у свеце мастацтва.
У кастрычніку мінулага года зламыснікі сярод белага дня праніклі ў парыжскі Луўр і выкралі ювелірныя вырабы на суму 100 мільёнаў даляраў.
На рабаванне Луўра ў зламыснікаў пайшло менш за восем хвілін. Рабаўнікоў было чацвёра; па даных следства, яны дзейнічалі па добра ўзгодненым плане.
Па дадзеных уладаў, злачынцы выкралі восем прадметаў — дыядэмы, каралі, завушніцы і брошкі. Усе яны адносяцца да XIX стагоддзя і калісьці належалі сем'ям французскіх каралёў і імператараў.
Некалькіх падазраваных з тых часоў затрымалі, але пра месцазнаходжанне выкрадзеных прадметаў нічога невядома.
Беларусы горача спрачаюцца, ці варта прывязваць дапамогу на дзіця да заробку маці51
Беларусы горача спрачаюцца, ці варта прывязваць дапамогу на дзіця да заробку маці
У Беларусі зацвердзілі правілы эвакуацыі каштоўнасцяў на выпадак вайны: цэглу з Брэсцкай крэпасці з надпісамі будуць ратаваць перш за карціны Шагала і Суціна1313
Каментары