Эклеры, баявое НЛП і дух «Вагнера». Што хаваецца за плотам спецназаўскай часці 3214
Вайсковая часць 3214 ва Уруччы лічыцца ключавой у сістэме спецназа. Яна супрацоўнічала з ПВК «Вагнер» і брала ўдзел у падаўленні пратэстаў у Беларусі. Але апошнія даныя пра дзяржзакупкі сведчаць: пад кіраўніцтвам Мікалая Карпянкова падраздзяленне ператварылася ў дзяржаву ў дзяржаве. Пакуль астатняе войска жыве паводле статута, тут ядуць торты і эклеры, вывучаюць псіхалогію выжывання ў канцлагерах і вучацца ў расійскіх наймітаў, распавядае DW.
Вітрына ўнутраных войскаў
Вайсковая часць 3214 унутраных войскаў МУС Беларусі — адно з самых вядомых і падрыхтаваных падраздзяленняў спецыяльнага прызначэння ў краіне. Яна размешчана ў Мінску, у раёне Уручча.
У склад часці ўваходзяць тры батальёны спецыяльнага прызначэння, разведвальная рота, рота забеспячэння спецаперацый, рота ганаровай варты і батальён забеспячэння.
Падраздзяленне выконвае шырокае кола задач: удзельнічае ў ахове грамадскага парадку, процідзейнічае незаконным узброеным фарміраванням, прыцягваецца да антытэрарыстычных аперацый, а таксама выкарыстоўваецца для падаўлення пратэстаў і затрымання апанентаў рэжыму Аляксандра Лукашэнкі.
На базе часці рэгулярна праходзяць вучэбныя зборы, у тым ліку для моладзі. Тут дзейнічае ваенна-патрыятычны клуб «Рысь», дзе падлеткаў навучаюць базавым вайсковым навыкам. Пры гэтым сама часць лічыцца паказальнай для ўнутраных войскаў — менавіта тут шмат у чым дэманструюць узровень падрыхтоўкі і забяспечанасці.
Як байцы зблізіліся з «вагнераўцамі»
З 2023 года в/ч 3214 апынулася ў цэнтры ўвагі праз кантакты з расійскай ПВК «Вагнер». Пасля сыходу з Украіны яе інструктары пачалі праводзіць заняткі як з вайскоўцамі, так і з выхаванцамі клуба «Рысь». Гэтыя візіты суправаджаліся і сімвалічнымі жэстамі: каля флагштока часці заўважалі сцяг ПВК «Вагнер», а камандуючы ўнутранымі войскамі і намеснік міністра ўнутраных спраў Мікалай Карпянкоў з’яўляўся з нестатутным шэўронам, стылізаваным пад сімволіку гэтай структуры.
Сам Карпянкоў адкрыта казаў пра супрацоўніцтва з «вагнераўцамі». Паводле яго слоў, гаворка ідзе не проста пра заняткі, а пра баявое зладжванне — сумесную адпрацоўку дзеянняў, пры якой падраздзяленні павінны быць гатовыя дзейнічаць разам з першых этапаў вучэнняў.
Ён падкрэсліваў, што байцы ПВК валодаюць «унікальным вопытам», які перадаецца беларускім сілавікам, і называў іх героямі. Паводле афіцыйных даных, за апошні год ва ўнутраных войсках былі створаны пяць новых падраздзяленняў і два атрады добраахвотнікаў, якія прайшлі падрыхтоўку пры ўдзеле інструктараў ПВК «Вагнер».
Незвычайныя закупкі для спецназу
На гэтым фоне вылучаюцца дзяржаўныя закупкі для часці 3214.
За апошні год для байцоў закупілі значныя аб’ёмы прадуктаў, якія не ўваходзяць у звычайны армейскі рацыён: 400 кілаграмаў эклераў, амаль дзве тоны тартоў, 2,5 тоны мармеладу і зефіру, звыш дзвюх тон глазураваных сыркоў, сотні кілаграмаў печыва і садавіны, дзве тоны арэхаў, амаль 150 тысяч літраў соку. Ніводная іншая часць не размяшчала падобных заявак.
Кіраўніцтва часці ўкладваецца і ў прафесійную падрыхтоўку.
Для байцоў аплачваюць спецыялізаваныя курсы — ад падводнага плавання для вадалазаў да прамысловага альпінізму і прафайлінгу, дзе вывучаюць метады псіхалагічнага назірання і аналізу паводзін.
Звяртае на сябе ўвагу і склад бібліятэкі часці — ён нетыповы для ваеннага падраздзялення. Акрамя стандартнай прававой літаратуры, тут ёсць кнігі па псіхалогіі і самаразвіцці.
У прыватнасці, у бібліятэцы прысутнічае праца «Сказаць жыццю «Так!»» Віктара Франкла пра выжыванне ў канцлагеры, а таксама выданні «Лекі ад нерваў», «Кіраванне гневам», «Перамагай дэпрэсію перш, чым яна пераможа цябе», «Рэўнасць. Як з ёй жыць і захаваць адносіны», «Свабода ад трывогі», «Заўтра дакладна кіну» (пра залежнасці). Ёсць і кнігі па камунікацыі і псіхалагічным уздзеянні, напрыклад, «Баявое НЛП. Тэхнікі і мадэлі схаваных маніпуляцый і абарона ад іх», «Геній камунікацыі. Як ім стаць?».
У в/ч 3214 таксама прадстаўлена мастацкая літаратура — фантастыка Сапкоўскага і Толкіна, сучасныя раманы «Дапамажы мне памерці», «Шантарам».
Як Карпянкоў дапамагае сваім байцам
Крыніцы DW сярод былых сілавікоў адзначаюць, што часць 3214 заўсёды знаходзілася на асаблівым становішчы, але пасля прыходу ў кіраўніцтва МУС Карпянкова яе роля і рэсурсы заўважна выраслі.
Паводле іх слоў, ён умее дабівацца дадатковых магчымасцяў для сваіх падраздзяленняў і тлумачыць кіраўніцтву, чаму менавіта яны павінны атрымліваць прыярытэт. «Карпянкоў умее прасоўваць інтарэсы сваіх і выбіваць для іх асаблівыя ўмовы», — кажа адзін з суразмоўцаў.
Іншая крыніца адзначае, што пры Карпянкове палепшыліся матэрыяльныя ўмовы службы: ва ўнутраных войсках у цэлым павялічылася колькасць кантрактнікаў, пашырылася жыллёвае забеспячэнне на ільготных умовах. «У мінулым годзе для іх здалі два дамы», — указаў ён. Сам Карпянкоў у інтэрв’ю дзяржаўнаму тэлебачанню таксама казаў пра развіццё інфраструктуры: паводле яго слоў, у часці ствараюць камфортныя ўмовы службы, каб вайскоўцы маглі аднаўляцца, а казармы павінны адпавядаць узроўню «казармы будучыні».
Паводле звестак крыніц, з 2021 года ва ўнутраных войсках адбыліся заўважныя змены, менавіта тады курыраваць іх паставілі Мікалая Карпянкова.
Узмоцнены ўпор на падраздзяленні спецыяльнага прызначэння, якія арыентаваны ў тым ліку на падаўленне пратэстаў — яны складаюць каля 35% ад агульнага складу.
Адначасова павялічваецца доля кантрактнікаў: каля 20% асабовага складу — афіцэры, 60% — прапаршчыкі і вайскоўцы па кантракце, яшчэ 20% — тэрміновая служба.
Пры гэтым прыкладна 60% тэрміновікаў пасля службы падпісваюць кантракт. Таксама ідзе актыўнае пераўзбраенне, а з 2025 года асаблівая ўвага надаецца беспілотнікам, якія ва ўнутраных войсках пачалі збіраць самастойна.
Цяпер чытаюць
Рыта Дакота ўпершыню распавяла, за што беларускія сілавікі схапілі яе маці ў 2022 годзе1
Каментары