Eklery, bajavoje NŁP i duch «Vahniera». Što chavajecca za płotam śpiecnazaŭskaj čaści 3214
Vajskovaja čaść 3214 va Uruččy ličycca klučavoj u sistemie śpiecnaza. Jana supracoŭničała z PVK «Vahnier» i brała ŭdzieł u padaŭleńni pratestaŭ u Biełarusi. Ale apošnija danyja pra dziaržzakupki śviedčać: pad kiraŭnictvam Mikałaja Karpiankova padraździaleńnie pieratvaryłasia ŭ dziaržavu ŭ dziaržavie. Pakul astatniaje vojska žyvie pavodle statuta, tut jaduć torty i eklery, vyvučajuć psichałohiju vyžyvańnia ŭ kancłahierach i vučacca ŭ rasijskich najmitaŭ, raspaviadaje DW.
Vitryna ŭnutranych vojskaŭ
Vajskovaja čaść 3214 unutranych vojskaŭ MUS Biełarusi — adno z samych viadomych i padrychtavanych padraździaleńniaŭ śpiecyjalnaha pryznačeńnia ŭ krainie. Jana raźmieščana ŭ Minsku, u rajonie Uručča.
U skład čaści ŭvachodziać try bataljony śpiecyjalnaha pryznačeńnia, raźviedvalnaja rota, rota zabieśpiačeńnia śpiecapieracyj, rota hanarovaj varty i bataljon zabieśpiačeńnia.
Padraździaleńnie vykonvaje šyrokaje koła zadač: udzielničaje ŭ achovie hramadskaha paradku, procidziejničaje niezakonnym uzbrojenym farmiravańniam, pryciahvajecca da antyterarystyčnych apieracyj, a taksama vykarystoŭvajecca dla padaŭleńnia pratestaŭ i zatrymańnia apanientaŭ režymu Alaksandra Łukašenki.
Na bazie čaści rehularna prachodziać vučebnyja zbory, u tym liku dla moładzi. Tut dziejničaje vajenna-patryjatyčny kłub «Ryś», dzie padletkaŭ navučajuć bazavym vajskovym navykam. Pry hetym sama čaść ličycca pakazalnaj dla ŭnutranych vojskaŭ — mienavita tut šmat u čym demanstrujuć uzrovień padrychtoŭki i zabiaśpiečanaści.
Jak bajcy zblizilisia z «vahnieraŭcami»
Z 2023 hoda v/č 3214 apynułasia ŭ centry ŭvahi praz kantakty z rasijskaj PVK «Vahnier». Paśla sychodu z Ukrainy jaje instruktary pačali pravodzić zaniatki jak z vajskoŭcami, tak i z vychavancami kłuba «Ryś». Hetyja vizity supravadžalisia i simvaličnymi žestami: kala fłahštoka čaści zaŭvažali ściah PVK «Vahnier», a kamandujučy ŭnutranymi vojskami i namieśnik ministra ŭnutranych spraŭ Mikałaj Karpiankoŭ źjaŭlaŭsia ź niestatutnym šeŭronam, stylizavanym pad simvoliku hetaj struktury.
Sam Karpiankoŭ adkryta kazaŭ pra supracoŭnictva z «vahnieraŭcami». Pavodle jaho słoŭ, havorka idzie nie prosta pra zaniatki, a pra bajavoje zładžvańnie — sumiesnuju adpracoŭku dziejańniaŭ, pry jakoj padraździaleńni pavinny być hatovyja dziejničać razam ź pieršych etapaŭ vučeńniaŭ.
Jon padkreślivaŭ, što bajcy PVK vałodajuć «unikalnym vopytam», jaki pieradajecca biełaruskim siłavikam, i nazyvaŭ ich hierojami. Pavodle aficyjnych danych, za apošni hod va ŭnutranych vojskach byli stvorany piać novych padraździaleńniaŭ i dva atrady dobraachvotnikaŭ, jakija prajšli padrychtoŭku pry ŭdziele instruktaraŭ PVK «Vahnier».
Niezvyčajnyja zakupki dla śpiecnazu
Na hetym fonie vyłučajucca dziaržaŭnyja zakupki dla čaści 3214.
Za apošni hod dla bajcoŭ zakupili značnyja abjomy praduktaŭ, jakija nie ŭvachodziać u zvyčajny armiejski racyjon: 400 kiłahramaŭ ekleraŭ, amal dźvie tony tartoŭ, 2,5 tony marmieładu i ziefiru, zvyš dźviuch ton hłazuravanych syrkoŭ, sotni kiłahramaŭ piečyva i sadaviny, dźvie tony arechaŭ, amal 150 tysiač litraŭ soku. Nivodnaja inšaja čaść nie raźmiaščała padobnych zajavak.
Kiraŭnictva čaści ŭkładvajecca i ŭ prafiesijnuju padrychtoŭku.
Dla bajcoŭ apłačvajuć śpiecyjalizavanyja kursy — ad padvodnaha płavańnia dla vadałazaŭ da pramysłovaha alpinizmu i prafajlinhu, dzie vyvučajuć mietady psichałahičnaha nazirańnia i analizu pavodzin.
Źviartaje na siabie ŭvahu i skład biblijateki čaści — jon nietypovy dla vajennaha padraździaleńnia. Akramia standartnaj pravavoj litaratury, tut jość knihi pa psichałohii i samaraźvićci.
U pryvatnaści, u biblijatecy prysutničaje praca «Skazać žyćciu «Tak!»» Viktara Frankła pra vyžyvańnie ŭ kancłahiery, a taksama vydańni «Leki ad niervaŭ», «Kiravańnie hnievam», «Pieramahaj depresiju pierš, čym jana pieramoža ciabie», «Reŭnaść. Jak ź joj žyć i zachavać adnosiny», «Svaboda ad tryvohi», «Zaŭtra dakładna kinu» (pra zaležnaści). Jość i knihi pa kamunikacyi i psichałahičnym uździejańni, naprykład, «Bajavoje NŁP. Techniki i madeli schavanych manipulacyj i abarona ad ich», «Hienij kamunikacyi. Jak im stać?».
U v/č 3214 taksama pradstaŭlena mastackaja litaratura — fantastyka Sapkoŭskaha i Tołkina, sučasnyja ramany «Dapamažy mnie pamierci», «Šantaram».
Jak Karpiankoŭ dapamahaje svaim bajcam
Krynicy DW siarod byłych siłavikoŭ adznačajuć, što čaść 3214 zaŭsiody znachodziłasia na asablivym stanoviščy, ale paśla prychodu ŭ kiraŭnictva MUS Karpiankova jaje rola i resursy zaŭvažna vyraśli.
Pavodle ich słoŭ, jon umieje dabivacca dadatkovych mahčymaściaŭ dla svaich padraździaleńniaŭ i tłumačyć kiraŭnictvu, čamu mienavita jany pavinny atrymlivać pryjarytet. «Karpiankoŭ umieje prasoŭvać intaresy svaich i vybivać dla ich asablivyja ŭmovy», — kaža adzin z surazmoŭcaŭ.
Inšaja krynica adznačaje, što pry Karpiankovie palepšylisia materyjalnyja ŭmovy słužby: va ŭnutranych vojskach u cełym pavialičyłasia kolkaść kantraktnikaŭ, pašyryłasia žyllovaje zabieśpiačeńnie na ilhotnych umovach. «U minułym hodzie dla ich zdali dva damy», — ukazaŭ jon. Sam Karpiankoŭ u intervju dziaržaŭnamu telebačańniu taksama kazaŭ pra raźvićcio infrastruktury: pavodle jaho słoŭ, u čaści stvarajuć kamfortnyja ŭmovy słužby, kab vajskoŭcy mahli adnaŭlacca, a kazarmy pavinny adpaviadać uzroŭniu «kazarmy budučyni».
Pavodle źviestak krynic, z 2021 hoda va ŭnutranych vojskach adbylisia zaŭvažnyja źmieny, mienavita tady kuryravać ich pastavili Mikałaja Karpiankova.
Uzmocnieny ŭpor na padraździaleńni śpiecyjalnaha pryznačeńnia, jakija aryjentavany ŭ tym liku na padaŭleńnie pratestaŭ — jany składajuć kala 35% ad ahulnaha składu.
Adnačasova pavialičvajecca dola kantraktnikaŭ: kala 20% asabovaha składu — aficery, 60% — praparščyki i vajskoŭcy pa kantrakcie, jašče 20% — terminovaja słužba.
Pry hetym prykładna 60% terminovikaŭ paśla słužby padpisvajuć kantrakt. Taksama idzie aktyŭnaje pieraŭzbrajeńnie, a z 2025 hoda asablivaja ŭvaha nadajecca bieśpiłotnikam, jakija va ŭnutranych vojskach pačali źbirać samastojna.
Kamientary