На трасе ў Лепельскім раёне будуюць тунэль для ласёў. Трэба толькі пераканаць жывёл ім карыстацца
Такія тунэлі для жывёл у Беларусі ўладкоўваюць ужо дзесяць гадоў.
Другі год ідзе рэканструкцыя аўтатрасы Р46, якая злучае Лепель і Полацк. Да восені гэтага года плануецца завяршыць рэканструкцыю яшчэ 30 км дарогі — да Лепеля. Тут будуюць падземны пераход для капытных жывёл, піша Blizko.by
Як адзначае спецыяліст Мікалай Садоўнікаў, пры будаўніцтве будуць ужытыя і новаўвядзенні.
— На 30‑кіламетровым участку, якім мы цяпер займаемся, упершыню будуць узведзеныя масты з пераходамі пад імі для парнакапытных жывёл. На працягу 38 км у месцах, дзе дарога перасякае лес, неабходна ўстанавіць агароджы-сеткі, каб ласі, казулі і алені не выбягалі раптоўна на праезную частку. Калі жыхары лесу натрапяць на такое агароджанне, яны будуць ісці ўздоўж яго да таго самага пераходу. Гэта своеасаблівы мост, які ўзводзіцца над зямлёй, а пад ім будзе прасторны тунэль, дзе парнакапытныя змогуць бяспечна прайсці пад аўтадарогай. Такое збудаванне хоць і затратнае, але, па-першае, вельмі зручнае для жывёл, а па-другое, бяспечнае для кіроўцаў.
Мікалай Садоўнікаў кажа, што яно зручнае для жывёл. Але насамрэч, як паказала практыка, парнакапытныя такімі падземнымі пераходамі не карыстаюцца.
Такія тунэлі для жывёл у Беларусі ўладкоўваюць ужо дзесяць гадоў. Напрыклад, у 2017 годзе такі пераход пабудавалі на трасе М6 Мінск — Гродна. Месца міграцыі жывёл вызначылі вучоныя Нацыянальнай акадэміі навук Беларусі, Мінпрыроды і Беларускай арганізацыі паляўнічых і рыбаловаў. Тунэль вышынёй 4,7 метра і шырынёй каля дзесяці метраў пракладзены пад асновай новай дарогі.
Цяпер чытаюць
«Цяпер мне чужая сама канцэпцыя ўжыць нешта, чаго ты не ведаеш». Вялікая гутарка з Іванам Шылам пра бізнэс, зараблянне з дапамогай ШІ, жанчын і ботакс13
Каментары