У Расіі загінуў палітвязень, якога пасадзілі за малюнак Пуціна ў выглядзе пеніса з георгіеўскай стужкай
У расійскай калоніі загінуў 41‑гадовы палітвязень Уладзімір Яроцкі, паведаміў канал «Палітзэк-Інфо». Па афіцыйнай версіі, мужчына пакончыў з сабой.
Краснадарскі мастак Уладзімір Яроцкі быў знойдзены мёртвым у калоніі ў ноч на 7 мая. Ён, як паведамляецца, скончыў жыццё самагубствам.
Раней мужчына неаднаразова скардзіўся на ціск з боку кіраўніцтва калоніі і прасіў адміністрацыю змяніць умовы працы з-за стану здароўя.
Краснадарца, які выступаў супраць СВА, у 2024 годзе прызналі вінаватым у распаўсюдзе «фэйкаў» пра расійскую армію па матывах палітычнай нянавісці і апаганьванні сімвалаў воінскай славы і прыгаварылі да 5,5 года пазбаўлення волі. Гэты быў другі прысуд.
А першы быў у 2023 годзе — за малюнак ва «УКантакце». На тым малюнку мастак піша партрэт Уладзіміра Пуціна з натуры, але на палатне ў яго атрымліваецца пеніс. І да Пуціна, і да пеніса прымацавана георгіеўская стужка.
Справа тады была заведзена па крымінальным артыкуле аб рэабілітацыі нацызму. Пра Пуціна ў прысудзе не гаварылася. Яроцкі прызнаў віну. Яму далі 1,5 года.
Гэта сёмая смерць палітвязняў у расійскіх калоніях з пачатку года.
Каментары