Ціханоўская: Сэнс сённяшняй даты не ў парадах і вайсковай тэхніцы на вуліцах
Святлана Ціханоўская звярнулася да беларусаў з нагоды 9 Мая.
«9 мая — дзень памяці. Дзень, калі мы ўспамінаем тых, хто перамог нацызм у Другой сусветнай вайне, і тых, хто не вярнуўся дадому. У Беларусі няма сям’і, якую б вайна абмінула. Мы памятаем гэты подзвіг, і менавіта таму асабліва балюча бачыць, як памяць пра гэтую жахлівую вайну выкарыстоўваюць як прапагандысцкі інструмент, каб апраўдаць новую», — гаворыцца ў звароце.
Сэнс гэтай даты не ў парадах і вайсковай тэхніцы на вуліцах. Нашыя дзяды і прадзеды хацелі, каб іх дзеці і ўнукі жылі звычайнае, мірнае жыццё. Хадзілі ў школу, кахалі, працавалі, будавалі свае сем’і. Яны дакладна не змагаліся за тое, каб беларуская зямля станавілася пляцоўкай для чужой агрэсіі, каб тут стаялі чужыя войскі, а з нашай краіны рабілі крыніцу пагрозы.
Беларусь заўсёды была і павінна заставацца краінай, якая не пагражае суседзям і не дазваляе выкарыстоўваць сябе супраць іншых.
Сёння побач з намі Украіна зноў плаціць страшную цану за мір — за права жыць на сваёй зямлі, размаўляць на сваёй мове, будаваць сваё ўласнае жыццё. Мы бачым, як вайна забірае жыцці, разбурае дамы, разлучае сем’і.
I менавіта таму памяць пра вайну павінна нагадваць нам берагчы жыццё, а не прывучаць дзяцей да ваеннай формы, захапляць зброяй і нармалізаваць гвалт. Памяць павінна вучыць адказнасці. Вучыць спачуванню, сумленнасці, павазе да чалавека і да суседзяў. Вучыць простаму: вайна — гэта трагедыя, а мір — гэта тое, што трэба будаваць разам.
Сёння я схіляю галаву перад усімі героямі, перад загінулымі і ахвярамі гэтай вайны. І вельмі хачу, каб лепшай памяццю пра іх стала Беларусь, у якой чалавечае жыццё — найвышэйшая каштоўнасць», — адзначыла Святлана Ціханоўская.
Каментары
К тому же разница между 8 и 9 мая обусловлена разницей часовых поясов при подписании Акта о капитуляции Германии в 1945 году. В Берлине это произошло поздно вечером 8 мая, когда в Москве уже наступило 9 мая.
А если брать за основу московское время, то и войну следовало закончить штурмом Москвы, а не Берлина!)