Марфа Рабкова: Я дакладна ведаю, у чыіх сілах дапамагчы палітвязням вярнуцца ў свае сем’і, дамы, жыцці
Праваабаронца, экс-палітвязень выступіла са зваротам, яго апублікаваў тэлеграм-канал «Ружовыя касынкі».
«Прывітанне, на сувязі Марфа Рабкова. На календары — май 2026 года. І я дзякую Богу за тое, што, запісваючы гэтае відэа, магу ўключыць настольную лямпу, у сваё задавальненне пачытаць кнігу і легчы спаць у цёплы ложак, ведаючы, што заўтра мне не трэба будзе прачынацца пад гук турэмнага званка», — кажа яна.
«Я дзякую Богу за тое, што заўтра змагу атрымаць асалоду ад цёплага вясновага сонца, седзячы на лаўцы ў парку з кубкам духмянай гарбаты ў руках. Слухаць шчабятанне птушак побач. Глядзець на белыя аблокі, што павольна плывуць па небе.
І я шчаслівая гэтым, здавалася б, банальным дробязям, бо яшчэ зусім нядаўна ўсё гэта было для мяне недаступным. Як і дагэтуль недаступна проста цяпер для больш як сотні жанчын, якія знаходзяцца ў зняволенні ў Беларусі.
І я дакладна ведаю, у чыіх сілах дапамагчы ім вярнуцца ў свае сем’і, у свае дамы, у свае жыцці. Прамы дыялог прадстаўнікоў ЗША з беларускай дзяржавай даў нам гэты шанец і ўсё яшчэ дазваляе трымаць дзверы ў нармальнасць прыадчыненымі.
За апошні год дзякуючы амерыканскаму перамоўнаму трэку свабоду атрымалі сотні людзей. Сотні сем’яў уздыхнулі з палёгкай. Сотні сем’яў атрымалі магчымасць працягнуць сябе ў дзецях. Сотні сем’яў могуць зноў узбагачаць сабой грамадства і свет у цэлым.
Я спадзяюся, што гуманітарны трэк будзе працягнуты і да яго далучыцца ўсё больш людзей добрай волі, якія таксама ўбачаць каштоўнасць у як найхутчэйшым вызваленні людзей і нармалізацыі сітуацыі ў Беларусі. Бо няма нічога важнейшага за маленькае жыццё маленькага чалавека.
На двары май 2026 года. Я жывая і свабодная. Я — маленькі чалавек, чыё маленькае жыццё было выратавана», — зазначае Марфа Рабкова.
***
Каардынатарка валанцёрскай службы «Вясны» Марфа Рабкова правяла за кратамі пяць з паловай гадоў, яна выйшла на волю 19 сакавіка 2026 года. Яна была асуджаная на 14 гадоў і 9 месяцаў паводле некалькіх артыкулаў. За час утрымання пад вартай яшчэ да суда ў Марфы памерлі бабуля і бацька, назіраліся праблемы са здароўем. Следчыя неаднаразова прапаноўвалі ёй супрацоўніцтва: за прызнанне віны ёй абяцалі змяніць меру стрымання і адпусціць да хворых бацькоў. Але Марфа заставалася прынцыповай у сваёй пазіцыі. Сваю віну яна не прызнала.
Цяпер чытаюць
Памятаеце вар’яцкую гонку ў Брэсце, падчас якой загінула трое? На ВІДЭА з экшн-камеры матацыкліста відаць, што ён разагнаўся да 186 км/г3
Каментары
Люди ни за что годами гниют в тюрьмах, а вы, сектанты, сидя в своём уютном гетто, будучи в полной безопасности, важно вещаете о "стратегии".
Плевать вам на политических.