У Мінску злодзей ехаў па аб’яве прадаваць скрадзены тэлефон, але ў аўтобусе сустрэў яго гаспадара
Гісторыя, вартая сюжэта крымінальнай камедыі, адбылася ў Мінску. 28‑гадовы серыйны злодзей скраў дарагі тэлефон у новага знаёмага, але атрымаць грошы не паспеў, бо выпадкова сеў з ахвярай у адзін транспарт.
Усё пачалося з таго, што хлопцы пазнаёміліся ў міліцэйскім пастарунку. Яны абодва былі затрыманыя па розных справах — за што менавіта, не паведамляецца.
Яны хутка знайшлі супольную мову. Калі іх адпусцілі, мужчыны вырашылі адзначыць сваё вызваленне і накіраваліся ў госці да аднаго з іх.
Там госць заўважыў каробку ад новенькага смартфона і адразу прыдумаў план: спачатку ён скраў каробку, а калі яны разам пайшлі ў краму, папрасіў у гаспадара і сам тэлефон нібыта «на хвілінку патэлефанаваць».
Смартфон каштаваў 1750 рублёў. Уладальнік даў гаджэт і пайшоў у краму, а яго новы прыяцель проста сышоў, выкінуўшы па дарозе сім-карту.
Пазней мужчына выставіў скрадзены тэлефон на папулярную гандлёвую пляцоўку ў інтэрнэце. Пакупнік знайшоўся хутка, і яны дамовіліся пра сустрэчу.
Прадавец сеў у аўтобус і паехаў на здзелку, як раптам у салоне яго нехта паклікаў.
Па неймаверным супадзенні ў гэты ж самы аўтобус зайшоў той самы пацярпелы, які адразу пацікавіўся, дзе ж яго маёмасць.
Смартфон давялося вярнуць на месцы, у аўтобусе пачалася сварка. Мужчыны разам выйшлі на найбліжэйшым прыпынку, дзе гаспадар тэлефона пабачыў міліцыянера і тут жа здаў яму ашуканца.
Як паведамілі «Мінск-Навінам» у пракуратуры Фрунзенскага раёна, затрыманы мінчанін афіцыйна не працуе, разведзены і ўжо мае пяць судзімасцей за крадзяжы. На яго завялі чарговую крымінальную справу. Сваю віну ён цалкам прызнаў. Акрамя суду, мужчыну чакае прымусовае лячэнне ад хранічнага алкагалізму.
Замест парэшткаў Вітаўта за сцяной Віленскай катэдры знайшлі толькі кучу камянёў. Але ўлады Літвы гатовыя выдаткаваць на працяг пошукаў яшчэ 1,5 мільёна еўра3232
Каментары