Дарадца Мінабароны Украіны: Глабальнае ўварванне фармату 2022 года ўжо не паўторыцца
Дарадца Міністэрства абароны Украіны Сяргей Бяскрэстнаў («Флэш») на сваёй старонцы ў фэйсбуку адказаў на пытанні, якія, па яго словах, ён атрымлівае «ад сяброў і знаёмых наконт пагроз з боку Рэспублікі Беларусь».
Па словах Сяргея Бяскрэстнава, у Міністэрстве абароны Украіны фіксуецца актыўнасць, якая ў будучыні можа ўяўляць пагрозу для Украіны або краін Еўропы, але гатоўнасці напасці з Беларусі «заўтра» пакуль што ніхто не бачыць.
Украінская разведка адсочвае сітуацыю ў цэлым, а ва УСУ дастаткова ўмацаванняў, войскаў на межах і войскаў у гатоўнасці, каб адбіць магчымую агрэсію.
«Глабальнае ўварванне фармату 2022 года ўжо не паўторыцца. Вайна змянілася. Любая калона тэхнікі не пратрымаецца і некалькіх гадзін», — сцвярджае Сяргей Бяскрэстнаў.
Па яго словах, магчымае адкрыццё фронту з Беларуссю можа мець толькі мэту адцягнуць частку ўкраінскіх войскаў на новы ўчастак фронту. Або Расія будзе выкарыстоўваць Беларусь як плацдарм для запуску ракет або шахедаў.
У кожным разе дарадца ўкраінскага Мінабароны запэўнівае, што УСУ гатовыя да самых розных сцэнарыяў і падзей. І выказвае спадзяванне, што
«народ і армія РБ бачаць сучасны фармат і вынікі бягучай вайны для ўсіх бакоў і не дазволяць уцягнуць сябе ў гэтае вар'яцтва. Народам Украіны і Беларусі няма чаго дзяліць і няма чаго варагаваць».
Цяпер чытаюць
У Магілёве на доме, які аддалі пад расійскае пасольства, замалявалі мурал з «Пагоняй». Хоць экспертыза забараняла гэта рабіць2
У Магілёве на доме, які аддалі пад расійскае пасольства, замалявалі мурал з «Пагоняй». Хоць экспертыза забараняла гэта рабіць
У Быхаве паставілі выродлівы помнік жанчыне. Разам са скульптурай у Касцюковічах ён можа стаць сімвалам культурнай дэградацыі Беларусі пры Лукашэнку5757
Каментары