У Севастопалі і на тэрыторыі ўсяго акупаванага Крыма праз блакаду Украінай дарог пачаліся сур'ёзныя праблемы з палівам.
З 31 мая бензін Аі-92 і АІ-95 у Севастопалі можна набыць толькі па спецыяльных талонах. Прызначаны Расіяй кіраўнік Севастопаля Міхаіл Разважаеў патлумачыў, што на мясцовых запраўках з самага ранку цалкам раскупілі сутачны ліміт паліва.
Улады назвалі ўвядзенне талонаў часовым і вымушаным крокам, каб пазбегнуць дэфіцыту і папоўніць рэзервы.
Акрамя таго, дзейнічае жорсткае абмежаванне на продаж паліва — не больш за 20 літраў. Падобныя захады напярэдадні закранулі іншыя гарады акупаванага Крыма.
Крызіс з палівам узнік з-за рэзкага скарачэння паставак, выкліканага рэгулярнымі атакамі ўкраінскіх беспілотнікаў на стратэгічную аўтатрасу «Наваросія».
Гэты наземны калідор злучае Растоў-на-Доне з Сімферопалем праз захопленыя паўднёвыя рэгіёны Украіны і цяпер з'яўляецца асноўным маршрутам забеспячэння Крымскага паўвострава.
Прызначаны Расіяй кіраўнік акупаванай часткі Запарожскай вобласці Яўген Баліцкі паведаміў, што ў раёне Бердзянска УСУ пачалі дыстанцыйна мініраваць гэты шлях з дапамогай БПЛА.
Паводле яго слоў, за суткі на падыходах да рэгіёна збіваюць каля 100 беспілотнікаў, аднак іх плынь застаецца вельмі шчыльнай, таму кіроўцаў просяць устрымацца ад паездак.
Паводле ацэнак экспертаў, украінскае войска здолела прасунуць пункты запуску дронаў бліжэй да лініі фронту, што дазволіла ім узяць пад агнявы кантроль лагістыку паўднёвага кірунку. На думку расійскіх ваенных аналітыкаў, гэтая тактыка накіравана на поўную ізаляцыю Крыма з паветра шляхам блакіроўкі асноўных транспартных артэрый.
Цяпер чытаюць
«Мне хацелі кампенсаваць каля 10% ад кошту пагарэлага». Як беларускія прадаўцы на Вайлдберыз вырашаюць вогненныя праблемы5
«Мне хацелі кампенсаваць каля 10% ад кошту пагарэлага». Як беларускія прадаўцы на Вайлдберыз вырашаюць вогненныя праблемы
«Надзея Сцяпанаўна». Мікіта Найдзёнаў апублікаваў паэму, якая нарадзілася ў Жодзінскай турме. Такога паэтычнага эпасу ў беларускай паэзіі ХХІ стагоддзя яшчэ не было66
Каментары