У Кеніі навукоўцы ўпершыню за больш як пяць гадоў зафіксавалі на фотапасткі горных бонга — рэдкіх антылоп, якіх называюць «прывідам лесу» з-за іх утойлівага ладу жыцця і здольнасці заставацца незаўважанымі ў густых лясах, паведамляе Iflscience.com.
Раней лічылася, што гэтыя жывёлы зніклі з рэгіёна Маасаі-Мау і захаваліся толькі ў гарах Абердэр. Прычынай рэзкага скарачэння іх колькасці сталі браканьерства і знішчэнне натуральнага асяроддзя пражывання. Сёння горны бонга знаходзіцца на мяжы знікнення.
Каб ацаніць стан папуляцыі, навукоўцы і прыродаахоўнікі паставілі сетку фотапастак у розных лясных раёнах, у тым ліку прыкладна за 200 кіламетраў ад Абердэрскіх гор. Атрыманая знаходка стала сапраўднай сенсацыяй: камеры зафіксавалі некалькіх бонга ў аддаленым фрагменце лесу Маасаі-Мау.
Па словах спецыялістаў, адзін з гэтых самцоў, магчыма, ужо трапляў на вочы даследчыкам яшчэ ў 2018 годзе, але толькі цяпер удалося атрымаць дакументальнае пацвярджэнне яго прысутнасці.
Прыродаахоўнікі адзначаюць, што гэта адкрыццё дае новую надзею на выратаванне віду. Паводле апошніх ацэнак, у дзікай прыродзе засталося менш за 40 горных бонга. Таму цяпер распрацоўваюцца дадатковыя меры аховы лясоў, дзе былі заўважаныя гэтыя жывёлы.
Часткай праграмы па захаванні віду таксама стала развядзенне бонга ў заапарках з наступным выпусканнем у дзікую прыроду. Спецыялісты спадзяюцца, што гэта дапаможа павялічыць колькасць жывёл і захаваць іх генетычную разнастайнасць.
На думку даследчыкаў, вяртанне «прывіда лесу» ў Маасаі-Мау сведчыць пра тое, што нават вельмі рэдкія віды могуць захоўвацца ў прыродзе значна даўжэй, чым меркавалася. Яны падкрэсліваюць, што знікненне гэтай незвычайнай антылопы стала б вялікай стратай для ўсёй сусветнай прыроднай спадчыны.
Цяпер чытаюць
Масавыя арышты афіцэраў прайшлі на авіябазе ў Мачулішчах — абвінавачваюць у сувязях з апазіцыяй43
Каментары