Трамп: Пуцін разумее, што ЗША прадаюць зброю краінам НАТА, а не непасрэдна Украіне
Прэзідэнт ЗША Дональд Трамп заявіў, што расійскі кіраўнік Уладзімір Пуцін разумее: амерыканская зброя прадаецца не непасрэдна Украіне, а краінам НАТА, якія ўжо самастойна распараджаюцца ёю. Пра гэта Трамп напісаў 24 ліпеня ў сацыяльнай сетцы Truth Social.
Паводле слоў прэзідэнта ЗША, падчас размовы Пуцін таксама запэўніў, што Расія не будзе прадаваць зброю Ірану.
Трамп адзначыў, што ЗША прадаюць узбраенні саюзнікам з НАТА поўным коштам, а далейшае размеркаванне гэтай зброі адбываецца ўжо па рашэнні саміх краін — удзельніц альянсу. Ён дадаў, што яго адносіны як з Пуціным, так і з прэзідэнтам Украіны Уладзімірам Зяленскім застаюцца нязменнымі.
«Ён (Пуцін. — Рэд.) разумее, што я не прадаю зброю Украіне, я прадаю яе краінам НАТО. Яны плацяць за яе поўную цану, а як гэта зброя размяркоўваецца потым, я паняцця не маю», — сказаў Трамп.
Амерыканскі прэзідэнт таксама паведаміў, што падчас нядаўняй сустрэчы ў Пекіне старшыня КНР Сі Цзіньпін паабяцаў яму, што Кітай ні пры якіх абставінах не будзе пастаўляць або прадаваць зброю Ірану. Паводле Трампа, гэта тычыцца і кітайскіх кампаній. Ён адзначыў, што давярае гэтым словам і лічыць, што Расія і Кітай не ўдзельнічаюць у канфлікце вакол Ірана. На яго думку, пастаўкі зброі Ірану былі б не ў інтарэсах ні Масквы, ні Пекіна.
«Улічваючы нашы адносіны, я веру яму (Сі Цзіньпіну. — Рэд.) на слова, і, акрамя таго, я раблю яму вялікую паслугу», — заявіў прэзідэнт ЗША.
Тым часам міністр замежных спраў Расіі Сяргей Лаўроў падчас сустрэчы з дзяржаўным сакратаром ЗША Марка Рубіа ў Маніле заявіў пра недапушчальнасць далейшых паставак зброі Украіне. У адказ Рубіа падкрэсліў, што палітыка Вашынгтона не змянілася: ЗША прадаюць узбраенні ў рамках праграмы НАТА, а не непасрэдна Кіеву.
У той жа дзень прэс-сакратар Крамля Дзмітрый Пяскоў заявіў, што ў Маскве ўлічваюць працяг паставак амерыканскай зброі Украіне. Пры гэтым, паводле яго, расійскі бок мае намер выкарыстаць у сваіх інтарэсах супярэчнасці ў падыходах адміністрацыі Трампа да ўкраінскага ўрэгулявання. Ён адзначыў, што ЗША працягваюць пастаўляць узбраенні Украіне.
Рубіа на сустрэчы з Лаўровым казаў пра неабходнасць сканчэння вайны ва Украіне
Трамп упершыню ўвёў пошліны супраць Расіі. Пачалася другая гандлёвая вайна з усім светам?
Зяленскі сустрэнецца з Трампам на наступным тыдні
Трамп можа пачаць ваенную аперацыю ў Малі, дзе знаходзіцца «Афрыканскі корпус» Пуціна
Пуцін адмаўляецца ад перамоваў да поўнага захопу Данбаса
Каментары
[Зрэдагавана]