Пуцін стаў пазбягаць паездак у рэгіёны ў еўрапейскай частцы Расіі, куды рэгулярна далятаюць дроны
Сярод выключэнняў — Масква, Санкт-Пецярбург і Валдай, дзе ў Пуціна ёсць рэзідэнцыі.
Пасля таго як у чэрвені Пуцін аднавіў візіты ў рэгіёны пасля працяглага перапынку, ён стаў пазбягаць візітаў у рэгіёны ў еўрапейскай частцы Расіі, куды часта далятаюць украінскія дроны, піша «Агенцтва».
Выключэннямі былі Масква, Санкт-Пецярбург, Валдай, дзе ў яго ёсць рэзідэнцыі, і Казань, куды Пуцін ездзіў 17 чэрвеня на запланаваны загадзя саміт «Расія — АСЕАН». Наведванне Казані стала першай паездкай у рэгіёны за 223 дні.
24 ліпеня Пуцін прыляцеў у Іркуцк і наведаў Іркуцкі авіяцыйны завод.
25 ліпеня Пуцін прыляцеў у Омск, дзе сустрэўся з прэзідэнтам Казахстана Касым-Жамартам Такаевым і наведаў форум міжрэгіянальнага супрацоўніцтва Расіі і Казахстана.
3 жніўня Пуцін прыехаў у Краснаярскі край і сустрэўся з кіраўніком рэгіёна Міхаілам Кацюковым. Загадзя ўлады не анансавалі гэты візіт.
Большасць рэгіёнаў, якія наведаў Пуцін гэтым летам, альбо зусім не становяцца цэллю атак УСУ, альбо падвяргаліся атакам даволі рэдка.
Упершыню БПЛА ў Омскай вобласці збілі 6 ліпеня 2026 года. У той жа дзень у Омску ўпершыню з пачатку вайны закрылі аэрапорт. Акрамя таго, пад атаку ўпершыню трапіў Омскі НПЗ.
У Іркуцкай вобласці дроны фіксавалі толькі адзін раз з пачатку вайны — у чэрвені 2025 года атацы падвергся аэрадром у межах аперацыі УСУ «Павуцінне». Тады дроны запускалі з фур на тэрыторыі Расіі.
У Краснаярскім краі беспілотнікі з пачатку вайны не збівалі ні разу.
Толькі Татарстан рэгулярна падвяргаецца атакам УСУ. Падчас візіту Пуціна ў Казань у горадзе прынялі жорсткія меры бяспекі. У тым ліку, у горад сцягнулі сілавікоў з іншых рэгіёнаў, увялі забарону на перасоўванне на самакатах на шэрагу вуліц, а жыхароў папярэдзілі пра чаканыя праблемы са сувяззю.
Да перапынку Пуцін апошні раз ездзіў у рэгіёны ў лістападзе 2025 года. Пасля меркаванай атакі па Валдаі ў снежні Пуцін перажываў праз сваю бяспеку, паведамляў суразмоўца «Праекта», блізкі да Крамля.
Каментары